Buxoro shahridagi “PMK bozori” yonib ketdi

2023-yilning 1-avgust kuni soat 02:05 da viloyat FVB navbatchi dispetchеrlik xizmatiga viloyat Milliy gvardiya xodimlari tomonidan qoʻl telefonidan qoʻng’iroq qilib, Buxoro shahar Ibn Sino koʻchasi yoʻl yoqasida joylashgan 2 qavatli savdo doʻkonlarida yongʻin sodir boʻlayotganligi toʻgʻrisida xabar bergan.

Voqea joyiga viloyat garnizonidan 11 ta yong‘in-qutqaruv ekipajlari hamda 7 ta hamkorlikdagi xizmatlarning texnikalari jalb etildi. Yongʻin joyiga soat 02:07 da yеtib borib, savdo doʻkonlarining taxminan 700 m² maydonga tarqalib, yonayotganligi toʻgʻrisida maʼlumot olingan va soat 03:11 da batamom oʻchirilgan.

Yong‘in oqibatida Ibn Sino koʻchasi yoʻli yoqasida joylashgan tadbirkorlik subyektlariga tegishli 2 qavatli 15 ta doʻkonning ichki tovar mahsulotlari va shift qismi yongan boʻlib, xuddi shu manzilda boʻlgan “Buxoro markaziy dehqon bozori” AJ ga qarashli 1 qavatli savdo pavilyonidagi 8 ta savdo doʻkonlari (jami 23 ta savdo doʻkoni) ichida boʻlgan tovar moddiy boyliklari va doʻkon jihozlari yonib zarar koʻrgan.

Yongʻindan bozor tasarufidagi pavilyon va savdo doʻkonlarining 10 000 m² maydoni saqlab qolindi.

Yongʻin natijasida insonlarning halok boʻlish va tan jarohati olish holatlari qayd etilmadi.

Sodir bo‘lgan yongʻin yuzasidan viloyat IIB va FVB tomonidan tеrgovga qadar tekshiruv ishlari olib borilmoqda.