Buxoroga “kinokarvon” yo‘l oladi

“O‘zbekkino” yangi kino-kunlariga start berdi.

Bugun, 24-mart kuni “O‘zbekkino” Milliy agentligi tomonidan “O‘zbekfilm” studiyasida “Yangi O‘zbekiston va milliy kinematografiya” shiori ostida Navro‘z bayramiga bag‘ishlangan tantanali kecha bo‘lib o‘tdi. Shuningdek, bugundan yangi kinokunlariga ham start berildi.

E’lon qilingan kinokunlari davomida Zulfiqor Musoqovning “Hayrat” va Fotih Jalolovning “Muqimiy” badiiy filmlari premyeralari, “Abdulla Oripov” va “Bastakor” hujjatli filmlari namoyishi, ijodiy uchrashuvlar, yubiley marosimlari, davra suhbatlari, ayollar media klubi muhokamalari, yosh kinoijodkorlar uchun mahorat darslari, pitchinglar va “Zumrasha” kinojurnalining yangi sonlari namoyishi bo‘lib o‘tadi. Shu bilan birga Jizzax, Buxoro va Samarqand viloyatlariga “Kinokarvon” yo‘l oladi. Loyiha davomida o‘zbek kinosi yulduzlari ishtirokida joylarda ijodiy uchrashuvlar va premyeralar o‘tkazilishi rejalashtirilgan.

Bo‘lib o‘tgan Navro‘z bayramida esa sumalak sayli tashkil etilib, estrada yulduzlari ijrosida kuy-qo‘shiqlar yangradi. Tadbirda o‘zbek kinosi ijodkorlari, aktyor va aktrisalar, san’at va madaniyat sohasi vakillari ishtirok etishdi.

“O‘zbekkino” MA buyurtmasiga binoan rejissyor Ayub Shahobiddinov tomonidan Umid Hamdamov ssenariysi asosida suratga olingan “Rangsiz tushlar” badiiy filmi Bangladesh xalqaro kinofestivalida “Eng yaxshi ssenariy” yo‘nalishida g‘oliblikni qo‘lga kiritgan edi. Bayram munosabati bilan rejissyor Ayub Shahobiddinov va ssenarist Umid Hamdamovlarga Bangladesh Xalq Respublikasining O‘zbekistondagi favqulodda va muxtor elchisi Jaxongir Alam tomonidan festival statuetkasi topshirildi.