Buxoroda qilichbozlik bilan shug‘ullanish uchun yangi zal ochildi

Buxoro Olimpiya va Paralimpiya sport turlariga tayyorlash markazida yangidan bunyod etilgan qilichbozlik markazi foydalanishga topshirildi. Bu haqda Buxoro viloyati hokimligi xabar bermoqda.

Umumiy qiymati 2,2 milliard soʻmni tashkil etgan ushbu loyiha doirasida 20×40 metr oʻlchamdagi, barcha zaruriy infratuzilma bilan taʼminlangan zamonaviy sport majmuasi barpo etildi.

Mashgʻulotlar oʻtish uchun qilichbozlar uchun 8 ta maxsus yoʻlakcha oʻrnatildi va jihozlandi. Umuman, mazkur sport zalida sportchilar uchun zarur barcha qulaylik va shart-sharoitlar yaratildi. Bu esa ularning professional darajada shugʻullanishiga keng imkoniyat ochib berdi.

Inshootning tantanali ochilish marosimida soʻz olganlar qilichbozlik kabi noyob va intellektual sport turini yanada ommalashtirish, iqtidorli yoshlarni saralab olish va professional sportchilarni tayyorlashda ushbu zal muhim ahamiyat kasb etishini alohida taʼkidlashdi. Bu joy yangi iqtidorlar, Osiyo, jahon va Olimpiya chempionlarini yetishtirib chiqarish bazasiga aylanishiga ishonch bildirildi.

Qayd etish lozimki, bugungi kunga qadar mamlakatimizda jahon standartlariga javob beradigan qilichbozlik sporti saroyi Qoraqalpogʻiston Respublikasi, Toshkent shahrida va Andijon viloyatida faoliyat koʻrsatar edi. Buxorodagi markaz esa toʻrtinchi qilichbozlik markazi sifatida faoliyat boshlagani bilan ham ahamiyatlidir.