Karachida savdo markazidagi yong‘in: qurbonlar soni ortmoqda, o‘nlab odam bedarak yo‘qolgan

Pokistonning Karachi shahrida joylashgan Gul Plaza savdo markazida sodir bo‘lgan kuchli yong‘in oqibatida halok bo‘lganlar soni kamida 14 nafarga yetdi. Qutqaruvchilar bedarak yo‘qolgan deb hisoblanayotgan 60–70 nafar odamni izlashda davom etmoqda.

Politsiya ma’lumotiga ko‘ra, tunda olib borilgan qidiruv-qutqaruv ishlari davomida yonib ketgan binodan yana besh nafar jasad chiqarib olindi. Hozirga qadar 38 kishi jarohat olgan, ayrimlari shifoxonalarda davolanmoqda.

Yong‘in 17-yanvar, shanba kuni kechqurun ko‘p qavatli savdo markazida boshlanib, uni to‘liq o‘chirish uchun 24 soatdan ortiq vaqt ketgan. Binoda 1200 ta do‘kon joylashgan bo‘lib, umumiy maydoni 8 ming kvadrat metrni tashkil etadi.

Qutqaruv xizmatlari xabariga ko‘ra, yong‘in haqidagi ilk qo‘ng‘iroq mahalliy vaqt bilan 22:38 da (Markaziy Yevropa vaqti bilan 18:38) kelib tushgan. O‘t o‘chiruvchilar yetib kelguniga qadar olov allaqachon yuqori qavatlarga tarqalib ulgurgan.

Shahar qutqaruv xizmati rahbari yong‘inning tez yoyilishiga binoda oson alangalanadigan mahsulotlar — atirlar, kiyim-kechak va plastik buyumlar mavjud bo‘lgani sabab bo‘lganini bildirdi.

Pokiston prezidenti Asif Ali Zardari halok bo‘lganlarning yaqinlariga hamdardlik bildirib, savdo va turar joy binolarida xavfsizlik choralarini keng qamrovda tekshirish bo‘yicha topshiriq berdi. Tekshiruvlar Sind viloyati hukumati bilan hamkorlikda olib borilmoqda.

Dastlabki taxminlarga ko‘ra, yong‘in do‘konlardan birida elektr simlaridagi qisqa tutashuv oqibatida kelib chiqqan. Hodisa yuzasidan rasmiy tergov boshlangan.

Ma’lumot uchun, Karachida yong‘inlar tez-tez takrorlanib turadi. Mutaxassislar buni past xavfsizlik standartlari va noqonuniy qurilishlar bilan izohlaydi. Xususan, 2023-yil noyabrida shahar savdo markazlaridan birida sodir bo‘lgan yong‘inda 10 kishi halok bo‘lgan, 22 kishi jarohat olgan. 2012-yilda esa tikuvchilik fabrikasidagi yirik yong‘in 260 kishining umriga zomin bo‘lgan edi.