Rasman: Eron oliy rahnamosi Ali Xomanaiy AQSh prezidenti Donald Tramp buyrug‘iga ko‘ra o‘ldirildi

Ali Xomanaiy AQSh va Isroil zarbalari oqibatida Tehronda halok bo‘lgani Eron rasmiylari tomonidan tasdiqlandi. Davlat OAVlari bu xabarni Donald Trumpning avvalroq qilgan bayonotidan so‘ng e’lon qildi.

Eron hukumati mamlakatda 40 kunlik motam va 7 kunlik umumxalq dam olish kunlari joriy etilganini ma’lum qildi.

Harbiy-siyosiy rahbariyat ham yo‘q qilingan

Rasmiy xabarlarga ko‘ra, zarba vaqtida Eron qurolli kuchlari Bosh shtabi rahbari general Abdolrahim Musaviy, Islom inqilobi qo‘riqchilari korpusi qo‘mondoni Muhammad Pakpur, Milliy mudofaa kengashi kotibi Ali Shamxani va mudofaa vaziri Aziz Nasirzoda ham halok bo‘lgan.

IRNA ma’lumotiga ko‘ra, ular Mudofaa kengashi yig‘ilishi chog‘ida nishonga olingan.

Shuningdek, Xomanaiyning ayrim qarindoshlari — qizi, nabirasi hamda kuyovi va kelini ham zarba oqibatida vafot etgani aytilmoqda.

Isroil va AQShning bayonotlari

Isroil tomoni zarba natijasida Xomanaiy yo‘q qilingani haqida avvalroq ma’lumot bergan edi. Isroil bosh vaziri Benjamin Netanyahu “bu zolimning endi tirik emasligi alomatlari bor” deya bayonot bergan.

Donald Tramp esa Truth ijtimoiy tarmog‘ida “Tarixdagi eng yovuz insonlardan biri o‘ldi” deb yozgan.

Sun’iy yo‘ldosh tasvirlari Tehrondagi Xomanaiy qarorgohi to‘liq vayron bo‘lganini ko‘rsatgani xabar qilinmoqda.

Tehronda qarama-qarshi kayfiyatlar

Shanba kuni ayrim Tehron hududlarida Xomanaiy o‘limi haqidagi xabardan so‘ng shodiyona ohanglari va hayqiriqlar eshitilgani haqida guvohlar ma’lumot bergan.

Biroq shu bilan birga, Tehron Yaqin Sharqdagi nishonlarga, jumladan Bahrayn va BAA hududlaridagi obyektlarga raketa zarbalari bergani xabar qilindi.

“Qasos olish — qonuniy huquq”

Eron parlamenti spikeri Mohammad Bagher Ghalibaf mamlakat bu ssenariyga tayyor bo‘lganini aytdi. Uning so‘zlariga ko‘ra, AQSh va Isroil “qizil chiziqni kesib o‘tgan”.

Prezident Masoud Pezeshkian bayonotida “qasos olish Eronning qonuniy huquqi va majburiyati” ekanini ta’kidladi. Milliy xavfsizlik kengashi vakillari Isroil va AQShga qarshi misli ko‘rilmagan zarbalar tayyorlanayotganini bildirdi.

Muvaqqat rahbar tayinlandi

Eron davlat televideniyesi ma’lum qilishicha, Alireza Arafi vaqtincha oliy rahbar vazifasini bajaruvchi etib tayinlangan.

O‘tish davrini uch yuqori martabali amaldordan iborat guruh nazorat qilishi kutilmoqda. Ular orasida prezident Masud Pezeshkian, sud hokimiyati rahbari G‘olamhusayn Mohseni-Ejeiy va Konstitutsiyani muhofaza qilish kengashi vakili bor.

86 yoshli Ali Xomanaiy 1979-yilgi inqilobdan keyin mamlakat siyosiy tizimida hal qiluvchi rol o‘ynagan va Eron qurolli kuchlarining oliy qo‘mondoni sifatida barcha muhim siyosiy va diniy qarorlar ustidan yakuniy so‘zga ega edi. U mamlakatdagi ommaviy norozilik namoyishlariga nisbatan qattiq repressiyalar bilan ham bog‘lab kelinadi.