Buxorodagi “zapravka”da benzin quyishda “urib” qolinayotgani aniqlandi

Buxoro viloyatida avtomobillarga yoqilg‘i quyish shoxobchasida iste’molchiga kam benzin quyilgani aniqlanib, holat bo‘yicha ish sudga oshirildi. Bu haqda texnik jihatdan tartibga solish sohasida nazorat inspeksiyasi ma’lum qildi.

Ma’lum bo‘lishicha, fuqaro Sh.M. yoqilg‘i quyish vaqtida kolonka ko‘rsatkichiga nisbatan kam benzin berilganidan shubhalanib, ishonch telefoniga murojaat qilgan. Ushbu murojaat asosida Peshku tumanida joylashgan “P. A. P.” xususiy korxonasida tekshiruv o‘tkazildi.

Nazorat davomida AI-92 markali yoqilg‘i quyish shoxobchasidagi “Texno Uz” rusumli ustuncha belgilangan me’yorlarga mos kelmasligi, ya’ni kam yoqilg‘i berayotgani aniqlangan. Bundan tashqari, korxonada foydalanilayotgan 6 dona o‘lchash vositasi metrologik tekshiruvdan o‘tmagani ham ma’lum bo‘ldi.

Aniqlangan qoidabuzarliklar yuzasidan korxona rahbariga nisbatan ma’muriy bayonnoma rasmiylashtirilib, ish hujjatlari Peshku tuman sudiga yuborilgan.

Mutasaddilar fuqarolarni shubhali holatlarga duch kelganda 1880 qisqa raqami orqali murojaat qilishga chaqirmoqda.

Mazkur holat yoqilg‘i bozorida nazoratni kuchaytirish zaruratini yana bir bor ko‘rsatmoqda.