Buxoro shahri kulgi va bayram og‘ushida: 1-aprel kuni “Nasriddin Afandi” festivali o‘tkaziladi

Buxoro shahrida 1-aprel — Butunjahon kulgi kuni munosabati bilan “Nasriddin Afandi” hamda “Sharq taomlari” an’anaviy festivallari tashkil etiladi. Mazkur tadbirlar qadimiy shaharning madaniy hayotini yanada jonlantirish, milliy qadriyatlar va kulgi madaniyatini keng targ‘ib etishga qaratilgan.

Festival doirasida Xo‘ja Nasriddin obraziga bag‘ishlangan turli yumoristik chiqishlar, satirik miniatyuralar va xalqona latifalar namoyish etiladi. Tomoshabinlar xalq og‘zaki ijodiga xos hazil-mutoyibalar, sahna ko‘rinishlari va qiziqarli afsonalar bilan tanishish imkoniga ega bo‘ladilar.

“Nasriddin Afandi” festivali Nodir Devonbegi madrasasi hududida, Nasriddin Afandi haykali yonida o‘tkazilishi rejalashtirilgan. “Sharq taomlari” festivali esa Somoniylar bog‘i kirish qismidagi maydonda tashkil etiladi.

“Sharq taomlari” festivali mehmonlarga o‘zbek milliy oshxonasining turli xil taomlari, jumladan halisa, palov, somsa, shirinliklar va boshqa an’anaviy taomlardan bahramand bo‘lish imkonini beradi.

Mazkur festivallar Buxoroning turizm salohiyatini oshirish, shaharga tashrif buyurayotgan mehmonlarga unutilmas taassurot ulashishga xizmat qiladi. Bunday tadbirlar orqali milliy qadriyatlar va xalq og‘zaki ijodi keng targ‘ib etilib, yosh avlodda madaniy merosga hurmat tuyg‘usi mustahkamlanadi.

Shuningdek, festival doirasida hunarmandchilik namoyishlari, ijodiy chiqishlar va turli ko‘ngilochar dasturlar ham tashkil etilishi kutilmoqda. Bu esa nafaqat mahalliy aholi, balki xorijiy sayyohlar uchun ham qiziqarli madaniy muhit yaratadi.

Buxoro yana bir bor o‘zining boy tarixiy merosi va betakror madaniy muhitini namoyon etib, mehmonlarni o‘ziga rom etishi shubhasiz.