Buxoro shahrida ommaviy yurish-marafoni o‘tkazildi

Kecha, 25-aprel kuni ertalab Buxoro davlat pedagogika instituti tashabbusi bilan “Yagona Vatan, yagona xalq bo‘lib, yangi hayot va kelajak yaratamiz!” shiori ostida ommaviy yurish-marafoni va sport-sog‘lomlashtirish tadbirlari tashkil etildi.

Marafon Ark qo‘rg‘oni oldidan start olib, Labi hovuz majmuasigacha davom etdi. Ushbu yo‘nalish ishtirokchilarga jismoniy faollik bilan birga Buxoroning tarixiy muhitini his qilish imkonini berdi.

Tadbirning asosiy maqsadi sog‘lom turmush tarzini targ‘ib qilish, yoshlar o‘rtasida birdamlik va jamoaviylikni kuchaytirishdan iborat bo‘ldi. Marafon bilan birga ertalabki badantarbiya mashg‘ulotlari ham tashkil etilib, ishtirokchilar kunni tetiklik va yuqori kayfiyatda boshlashdi.

Tadbir davomida samimiy muhit va faol ishtirok alohida ajralib turdi. Ishtirokchilar o‘zaro hamjihatlikni namoyon etib, sport orqali sog‘lom hayot tarzini qo‘llab-quvvatlashdi.

Mazkur marafon nafaqat jismoniy faollikni oshirish, balki jamiyatda ijobiy muhitni mustahkamlashga xizmat qildi.