O‘zbekistonda «Renault Avtovaz» zavodi quriladi

Jizzax viloyatida Fransiyaning Renault Avtovaz avtomobil zavodi quriladi. Bu haqda Fransiyaning O‘zbekistondagi ishonchli muvaqqat vakili Bris Rokfey hamda fransuz biznes-hamkorlari bilan uchrashuv o‘tkazgan Jizzax viloyati hokimi o‘rinbosari Azim Ahmadxo‘jayev ma’lum qildi.

Uchrashuvda Fransiya tomoni ishtirok etayotgan float-oyna va FIVES STEIN avtomobillar uchun oyna ishlab chiqarish zavodi; mahalliy ishlab chiqarilayotgan BOPP plyonkalarini sotish kabi Jizzaxning uch investisiya loyihalarining hozirgi ahvoli muhokama qilingan va dastlabki bitimlar imzolangan.

“Joriy yilda Renault Avtovaz avtomobil zavodi qurilishi va ishga tushirilishi ko‘zda tutilgan. Muzokaralar jarayonida mazkur loyihalarni amalga oshirishning aniq muddatlari belgilab olingan”, degan Ahmadxo‘jayev.

Bundan tashqari, Jizzax viloyatida turizm biznesini rivojlantirish uchun Fransiyaning sayyohlik kompaniyalarini jalb etish to‘g‘risidagi kelishuvga erishilgan.