O‘zbekiston va Tojikiston chegara hududlarida mobil aloqa sifatini yaxshilamoqda

Tojikiston va O‘zbekiston chegara hududlarida mobil aloqa sifatini yaxshilash bo‘yicha qo‘shma texnik ishlarni boshladi. Bu haqda Tojikiston Aloqa xizmati ma’lum qildi.

Xabarga ko‘ra, Tojikiston tomonining taklifiga binoan O‘zbekiston Elektromagnit moslashuv markazi mutaxassislari qo‘shni davlatga tashrif buyurgan. Ular Tojikiston elektromagnit moslashuv va radiomonitoring markazi xodimlari bilan birgalikda 2300 MGs diapazonidagi radiochastota spektrini o‘rgangan.

Mutaxassislarning ta’kidlashicha, bunday monitoring ishlari chegara hududlarida mobil operatorlar signallarining bir-biriga xalaqit berishini oldini olish uchun muhim hisoblanadi. Chunki ayrim hollarda qo‘shni davlat operatorining signali boshqa hududga kirib borib, aloqa sifati pasayishiga sabab bo‘lishi mumkin.

O‘rganishlar davomida mobil tarmoqlarga ta’sir qilayotgan signal manbalari aniqlanib, ularning texnik ko‘rsatkichlari baholandi. Shuningdek, mobil aloqa tizimlarining texnik parametrlari o‘zaro kelishib olindi.

Tomonlar aloqadagi xalaqitlarni kamaytirish va mobil internet sifatini yaxshilash bo‘yicha qo‘shma texnik yechimlarni ham ishlab chiqdi. Dastlabki bosqichda ushbu choralar Tojikistonning Tursunzoda, Shahrinav va Hisor tumanlarida aloqa sifatini yaxshilashga xizmat qilishi kutilmoqda.

Mutaxassislar fikricha, mobil tarmoqlar parametrlarini muntazam ravishda sinxronlashtirib borish ikki davlat chegara hududlarida aloqaning yanada barqaror ishlashiga yordam beradi.

Shuningdek, bu hamkorlik telekommunikatsiya va raqamli infratuzilma sohasidagi aloqalarni mustahkamlashda ham muhim ahamiyat kasb etmoqda. So‘nggi yillarda Markaziy Osiyo davlatlari o‘rtasida raqamli texnologiyalar va axborot almashinuvi bo‘yicha hamkorlik izchil kengayib bormoqda.

Mutasaddilarning qayd etishicha, sifatli mobil aloqa nafaqat oddiy foydalanuvchilar, balki biznes, transport va davlat xizmatlari uchun ham katta ahamiyatga ega. Shu sababli chegara hududlarida aloqa sifatini yaxshilash bo‘yicha bunday qo‘shma loyihalar davom ettiriladi.