Yaponiya granti asosida Buxoro shoshilinch tibbiy yordam filialiga zamonaviy uskunalar yetkazildi

Yaponiya hukumati granti asosida Respublika shoshilinch tibbiy yordam ilmiy markazi Buxoro filialiga zamonaviy tibbiy uskunalar yetkazildi. Bu haqda Buxoro viloyati Sog‘liqni saqlash boshqarmasi Buxoroisharif.uz internet nashriga ma’lum qildi.

Yaponiya O‘zbekiston sog‘liqni saqlash tizimining ishonchli hamkorlaridan biri hisoblanadi. Ikki tomonlama loyihalar tibbiyot xodimlarini tayyorlash, zamonaviy davolash va diagnostika usullarini joriy etish, muassasalarning moddiy-texnik bazasini mustahkamlash hamda sohani raqamlashtirish yo‘nalishlarini qamrab olgan.

3-sentabr kuni Yaponiyaning O‘zbekistondagi Favqulodda va muxtor elchisi Hatori Takashi boshchiligidagi delegatsiya sog‘liqni saqlash vaziri o‘rinbosari Sh. Muhammedov hamrohligida Respublika shoshilinch tibbiy yordam ilmiy markazi Buxoro filialida bo‘ldi.

Mehmonlarni Buxoro viloyati Sog‘liqni saqlash boshqarmasi boshlig‘i M. Rajabov kutib oldi. Delegatsiya filialda aholiga ko‘rsatilayotgan tibbiy xizmatlar, bemorlar uchun yaratilgan sharoitlar, zamonaviy davolash va diagnostika jarayonlari, shuningdek, muassasaning imkoniyatlari va erishgan natijalari bilan tanishdi.

Uchrashuvda sog‘liqni saqlash sohasidagi hamkorlikni yanada kengaytirish, ilg‘or tibbiy texnologiyalarni joriy etish, mutaxassislar malakasini oshirish va tibbiy xizmat sifatini yaxshilash masalalari muhokama qilindi.

Muloqot davomida Yaponiya tibbiyotining ilg‘or tajribasi, ayniqsa murakkab jarrohlik amaliyotlaridagi yutuqlari alohida qayd etildi. Ushbu tajribani mahalliy amaliyotga tatbiq etish istiqbollari ham ko‘rib chiqildi.

Yaponiya hukumati granti doirasida filial uchun 111,7 ming AQSh dollari miqdorida mablag‘ ajratilib, zamonaviy gisteroskop va artroskop uskunalari yetkazildi. Bu jihozlar markazning diagnostika va davolash imkoniyatlarini kengaytirib, tibbiy xizmat sifatini oshirishga xizmat qiladi.

Tomonlar o‘zaro manfaatli hamkorlikni davom ettirish, qo‘shma loyihalarni ko‘paytirish va tajriba almashinuvini kengaytirishga kelishib oldi. Tashrif O‘zbekiston va Yaponiya o‘rtasidagi do‘stona munosabatlarni mustahkamlashga xizmat qilishi ta’kidlandi.