G‘ijduvonda 954,3 million so‘mga yangilangan oilaviy shifokor punkti ishga tushdi

G‘ijduvon tumanining Jovgari mahallasida kapital ta’mirdan chiqarilgan oilaviy shifokor punkti qayta faoliyat boshladi. Bu haqda Buxoro viloyati sog‘liqni saqlash boshqarmasi Buxoroisharif.uz internet nashriga ma’lum qildi.

Tuman markazidan olis hududda joylashgan ushbu tibbiyot muassasasi «Qishloq joylarni barqaror rivojlantirish» — OPEK loyihasi doirasida yangilandi. Ta’mirlash va jihozlash ishlariga 954,3 million so‘m mablag‘ yo‘naltirildi.

Obyektning loyiha-smeta hujjatlari «Qishloq qurilish loyiha» tashkiloti tomonidan ishlab chiqildi. Qurilish va ta’mirlash ishlarini esa «El-Jahon Event Buildings» mas’uliyati cheklangan jamiyati amalga oshirdi.

Kapital ta’mir natijasida muassasaning xonalari zamonaviy talablar asosida qayta tashkil etilib, bemorlarni qabul qilish va tibbiy xizmat ko‘rsatish uchun zarur sharoitlar yaratildi. Punkt yangi tibbiy jihozlar bilan ham ta’minlandi.

Oilaviy shifokor punktida aholiga birlamchi tibbiy-sanitariya yordami ko‘rsatish, profilaktik ko‘riklarni tashkil etish, kasalliklarni erta aniqlash va bemorlarga tibbiy maslahat berish imkoniyatlari kengaytirildi.

Muassasaning qayta ishga tushirilishi, ayniqsa, tuman markazidan uzoqda yashovchi fuqarolarning sifatli tibbiy xizmatlardan foydalanish imkoniyatini yaxshilaydi. Endilikda mahalla aholisi zarur birlamchi yordamni o‘z hududida olishi mumkin.

Yangi sharoitlar tibbiyot xodimlarining ish samaradorligini oshirish, kasalliklarning oldini olish va aholi o‘rtasida sog‘lom turmush tarzini targ‘ib etishga xizmat qilishi kutilmoqda.

Oilaviy shifokor punktining ochilish marosimida mahalla faollari, nuroniylar, sog‘liqni saqlash sohasi xodimlari va jamoatchilik vakillari ishtirok etdi.