Gazli shahrida 21 gektar maydonda yangi istirohat bog‘i barpo etilmoqda

Romitan tumanining Gazli shahrida 21 gektar maydonda yangi istirohat bog‘i barpo etilmoqda. Bu haqda Buxoro viloyati Ekologiya bosh boshqarmasi Buxoroisharif.uz internet nashriga ma’lum qildi.

Yangi maskan Gazli shahrining 70 yilligi munosabati bilan “Yashil makon” umummilliy loyihasi doirasida tashkil etilmoqda. Hozir bog‘ hududida bunyodkorlik va obodonlashtirish ishlari jadal davom etmoqda.

Ayni kunlarda hududda manzarali daraxt va buta ko‘chatlari ekilmoqda. Yashil maydonni kengaytirish, bog‘ni obodonlashtirish hamda aholining mazmunli hordiq chiqarishi uchun qulay sharoit yaratishga qaratilgan ishlar olib borilmoqda.

Yangi istirohat bog‘i kelgusida Gazli shahrining ko‘rkam qiyofasini yanada yaxshilashi, yashil hududlarni ko‘paytirishi va aholiga munosib dam olish maskani yaratishga xizmat qilishi kutilmoqda.