Buxoroda tug‘ma oyoq deformatsiyasi bo‘lgan ikki bolada murakkab operatsiya o‘tkazildi

Buxoro viloyatida tug‘ma ortopedik nuqson bilan yashagan ikki bolada murakkab yuqori texnologik jarrohlik amaliyoti muvaffaqiyatli o‘tkazildi. Bu haqda Respublika shoshilinch tibbiy yordam ilmiy markazi Buxoro filiali Buxoroisharif.uz internet nashriga ma’lum qildi.

Bolalar ortopedik jarrohligi tug‘ma va orttirilgan tayanch-harakat tizimi nuqsonlarini davolashga qaratilgan. Bola organizmi o‘sishda davom etishi sababli bunday amaliyotlar kattalardagi operatsiyalardan farq qiladi hamda jarrohdan yuqori aniqlik va alohida yondashuvni talab etadi.

Buxoro shahri va G‘ijduvon tumanida yashovchi, 2014 hamda 2020-yillarda tug‘ilgan bolalarning yaqinlari markaz filialiga murojaat qilgan. Bolalar uzoq vaqt davomida tug‘ma kontraktura va oyoq deformatsiyasidan aziyat chekkan, avvalgi davolash muolajalari esa ijobiy natija bermagan.

Obyektiv ko‘rik, laboratoriya va diagnostik tekshiruvlardan so‘ng jarrohlik amaliyotini o‘tkazish to‘g‘risida qaror qabul qilindi. Shu maqsadda Respublika ixtisoslashtirilgan travmatologiya va ortopediya ilmiy-amaliy tibbiyot markazi professori O. Jabborberganov Buxoro filialiga taklif etildi.

Filialning bolalar travma jarrohligi bo‘limida professor rahbarligida oyoqning og‘ir deformatsiyasini bartaraf etishga qaratilgan navbatdagi murakkab yuqori texnologik amaliyot bajarildi. Operatsiyani professor O. Jabborberganov va bo‘lim travmatologi B. Muhamedov muvaffaqiyatli o‘tkazdi.

Hozirda bolalarning holatida ijobiy ko‘rsatkichlar qayd etilmoqda. Ularning oyoqlaridagi odatiy harakatlar bosqichma-bosqich tiklanmoqda.

Tashrif davomida professor bolalarda ortopedik nuqsonlarning oldini olish, ularni erta aniqlash, zamonaviy MSKT va MRT tekshiruvlaridan samarali foydalanish hamda yuqori texnologik davolash usullarini qo‘llash bo‘yicha o‘z tajribasi bilan o‘rtoqlashdi.