Olotlik duradgor oyiga qariyb 40 million so‘mlik mahsulot tayyorlamoqda

Olot tumanining “Oq oltin” mahallasida yashovchi duradgor Sherbek G‘afforov buyurtmachilar talabiga mos eshik va deraza romlarini tayyorlab, mahallada yoshlarni kasb-hunarga o‘rgatmoqda. Bu haqda Buxoro viloyati hokimligi matbuot xizmati Buxoroisharif.uz internet nashriga ma’lum qildi.

Tarixiy va an’anaviy qadriyatlarga boy xalq amaliy hunarmandchiligi zamonaviy texnologiyalar bilan uyg‘unlashib, aholi bandligini ta’minlash, yoshlarni kasbga yo‘naltirish va oilalar daromadini oshirishga xizmat qilmoqda. Duradgorlikni puxta egallagan ustalar sifatli mahsulot tayyorlash bilan birga ustoz-shogird an’anasini ham davom ettirmoqda.

Sherbek G‘afforov bundan ikki yil avval “G‘afforov Elyor” yakka tartibdagi tadbirkorlik subyektini yo‘lga qo‘ygan. U tashkil etgan sexda eshik va deraza romlari, shuningdek, boshqa yog‘och buyumlar tayyorlanib, aholi buyurtmalari bajarilmoqda.

Usta kasbni, avvalo, otasidan va ustozlaridan o‘rganganini aytadi. Hozir sex Xitoyda ishlab chiqarilgan zamonaviy uskuna va dastgohlar, frezer hamda boshqa texnologik vositalar bilan jihozlangan. Bu qo‘l mehnatini kamaytirib, zamonaviy andozalar asosida romlar tayyorlash va buyurtmachilarga yetkazib berish imkonini bermoqda.

To‘rt kishilik sexda haftasiga o‘rtacha 10–15 dona eshik va qariyb 30 dona deraza romi tayyorlanmoqda. Bir oyda qariyb 40 million so‘mlik mahsulot ishlab chiqarilib, xaridorlarga yetkazib berilmoqda.

Kundalik buyurtmalar aholining talab va istaklaridan kelib chiqib, zamonaviy yondashuv asosida bajarilmoqda. Eshik va romlarga zamonaviy hamda milliy uslubdagi naqsh va shakllar berilishi, yog‘och va boshqa xomashyolar sifatiga e’tibor qaratilishi mahsulotlarga talabni oshirmoqda.

Sherbek G‘afforovning faoliyati sifatli mahsulot ishlab chiqarish bilan birga hunarmandchilik an’analarini asrab-avaylash, yoshlarga kasb o‘rgatish va mahallada bandlikni ta’minlashga xizmat qilmoqda.