Buxoro tibbiyot muassasalarida 100 dan ortiq bo‘sh ish o‘rni uchun tanlov e’lon qilindi

Buxoro viloyatidagi tibbiyot muassasalarida 100 dan ortiq bo‘sh ish o‘rni uchun ochiq va shaffof tanlov e’lon qilindi. Bu haqda Buxoro viloyati Sog‘liqni saqlash boshqarmasi Buxoroisharif.uz internet nashriga ma’lum qildi.

Dastlab e’lon qilingan vakansiyalar orasida Respublika shoshilinch tibbiy yordam ilmiy markazi Buxoro filiali Qorako‘l tumani bo‘limi shoshilinch tibbiy yordam brigadasi shifokori, viloyat Sog‘liqni saqlash boshqarmasining birlamchi tibbiy-sanitariya yordamini tashkil etish bo‘yicha bosh mutaxassisi, Buxoro shahar tibbiyot birlashmasining 8-son oilaviy poliklinikasida oftalmolog hamda 10-son oilaviy poliklinikasida rentgenolog-flyuorograf lavozimlari bor.

Ro‘yxatda, shuningdek, 1-son oilaviy poliklinikada kadrlar bo‘yicha inspektor, 2-son oilaviy poliklinikada infeksionist, 3-son oilaviy poliklinikada kardiolog hamda Buxoro tuman tibbiyot birlashmasining 4-son oilaviy poliklinikasida bo‘lim mudiri lavozimlari ko‘rsatilgan. Qorako‘l tumanidagi shoshilinch yordam brigadasi shifokori uchun yana bir nechta vakant o‘rin ham mavjud.

Lavozimlarning aksariyati uchun oliy tibbiy ma’lumot, ayrim mutaxassisliklar bo‘yicha esa klinik ordinatura yoki bakalavr darajasi talab etiladi. Nomzodlar tegishli tartibda hujjat topshirib, baholash va suhbat bosqichlaridan o‘tadi.

Tanlov jarayonining ochiqligini ta’minlash maqsadida baholash va suhbatlar onlayn tarzda jonli efirga uzatiladi. E’lon qilingan vakansiyalar tibbiyot tizimiga malakali mutaxassislarni jalb etish va bo‘sh lavozimlarni shaffof tartibda to‘ldirishga qaratilgan.