Grant ko‘magida buxorolik Oybek Ramazonov uchun avtomobil ustaxonasi tashkil etildi

Grant ko‘magi tufayli Buxoro tumani Sadriddin Ayniy mahallasida yashovchi Oybek Ramazonov uchun yangi imkoniyat yaratildi. Bu haqda Buxoro viloyati hokimligi Buxoroisharif.uz internet nashriga ma’lum qildi.

Oliy Majlis huzuridagi Fuqarolik jamiyati institutlarini qo‘llab-quvvatlash jamoat fondining Buxoro viloyati hududiy bo‘linmasi o‘tkazgan ochiq grant tanlovida “Yoshlar – kelajagimiz” jamg‘armasi Buxoro viloyati filiali loyihasi g‘olib bo‘ldi. Loyiha Oybek Ramazonovning bandligini ta’minlash va doimiy daromad manbaini yaratishga qaratilgan.

Tanlov g‘oliblariga sertifikatlar topshirilib, loyiha doirasida grant mablag‘lari ajratildi.

Buxoro shahrining Namozgoh mahallasida ta’mirtalab binoning 30 kvadrat metrli xonasi ustaxonaga aylantirildi.

U yerga zamonaviy chilangarlik va avtomobillarga xizmat ko‘rsatish uskunalari o‘rnatildi. Jumladan, Launch X-861 g‘ildiraklarni sozlash stendi hamda 216 qismdan iborat asboblar jamlanmasi topshirildi.

Yangi ustaxona Oybek Ramazonovning doimiy ish bilan ta’minlanishi, kasbiy salohiyatidan samarali foydalanishi va barqaror daromad olishi uchun sharoit yaratadi.

Loyiha, shuningdek, hududlarda tadbirkorlik va o‘zini o‘zi band qilish imkoniyatlarini kengaytirish, oilalarning iqtisodiy barqarorligini mustahkamlashga xizmat qilishi ko‘zda tutilgan.

Uskunalar bilan jihozlangan ushbu kichik ustaxona bir oilaning daromad manbaini yaratish bilan birga, mahalliy aholiga avtomobillarga xizmat ko‘rsatish imkonini ham beradi. Batafsil ma’lumot O‘zA materialida keltirilgan.