Buxoro neftni qayta ishlash zavodi jamoasi ekologik tanlovda birinchi o‘rinni egalladi

“O‘zbekneftgaz” tizimidagi kasaba uyushmalari jamoalari o‘rtasida o‘tkazilgan respublika tanlovining ikkinchi bosqichida Buxoro neftni qayta ishlash zavodi kasaba uyushmasi qo‘mitasi “Ekologik faol kasaba uyushmasi jamoasi” nominatsiyasida birinchi o‘rinni egalladi. Bu haqda Buxoro neftni qayta ishlash zavodi Buxoroisharif.uz internet nashriga ma’lum qildi.

Tanlov natijalari Energetika, neft-gaz va geologiya xodimlari kasaba uyushmasi Respublika kengashi ijroiya qo‘mitasining 2026-yil 11-sentabrdagi 05-10 “s”-son qarori bilan tasdiqlangan.

Ikkinchi o‘rin “Sho‘rtan gaz-kimyo majmuasi” hamda “O‘zbekgeofizika” aksiyadorlik jamiyatlari kasaba uyushmasi qo‘mitalariga nasib etdi.

Ishtirokchilar ish beruvchi bilan hamkorlik, atrof-muhitni muhofaza qilish, ekologik madaniyatni oshirish va tabiiy resurslardan oqilona foydalanish yo‘nalishlarida amalga oshirgan ishlari asosida baholandi.

Hududlarni ko‘kalamzorlashtirish va “yashil” tashabbuslarni qo‘llab-quvvatlash bo‘yicha natijalar ham tanlov mezonlari qatoridan joy oldi. Buxoro neftni qayta ishlash zavodi jamoasining g‘olibligi korxonada ekologik mas’uliyatga qaratilgan tizimli ishlar e’tirof etilganini ko‘rsatadi.