Kogondagi uch qishloqda 3 ming metrdan ziyod ichki yo‘l asfaltlashtirildi

Kogon tumanidagi “Bahouddin Naqshband” mahalla fuqarolar yig‘iniga qarashli Kulolon, Qozoqovul va Rabotipoyon qishloqlarida 3 ming metrdan ziyod ta’mirtalab ichki yo‘lni asfaltlashtirish ishlari yakunlandi. Bu haqda Buxoro viloyati hokimligi Buxoroisharif.uz internet nashriga ma’lum qildi.

Ishlar Prezidentning 2021-yil 18-sentabrdagi “Islom taraqqiyot banki va OPEK Xalqaro taraqqiyot jamg‘armasi ishtirokida “Qishloq joylarni barqaror rivojlantirish” loyihasini amalga oshirish chora-tadbirlari to‘g‘risida”gi qarori asosida bajarildi. Islom taraqqiyot banki guruhi ishtirokidagi mazkur loyiha doirasida tumanda yo‘l va muhandislik-kommunikatsiya tarmoqlarini rekonstruksiya qilish hamda ta’mirlash davom etmoqda.

Yo‘lsozlik-ta’mirlash ishlarini “Gazli yo‘l qurish-ta’mirlash” MChJ mutaxassislari maxsus texnika va mexanizmlar yordamida belgilangan talablar asosida amalga oshirdi.

Ta’mirlashdan oldin yo‘llarning mavjud holati atroflicha o‘rganilib, asos qismi qayta tekislandi. Keyin texnik talablar bo‘yicha mustahkam poydevor qatlami shakllantirilib, asfalt qoplamasi yotqizildi.

“Bahouddin Naqshband” mahallasida 1 136 ta xonadonda 5 400 nafardan ziyod aholi istiqomat qiladi. Hozirga qadar faollar barcha xonadonlarni xatlovdan o‘tkazib, aholining ijtimoiy ahvolini uyma-uy o‘rgangan.

O‘rganishlarda aholi murojaatlari va ijtimoiy muammolar bilan birga muhandislik-kommunikatsiya tarmoqlari, jumladan, yo‘llarni ta’mirlash masalasiga ham alohida e’tibor qaratildi.

Hokimlik matbuot xizmati yo‘l va infratuzilmaga oid bunyodkorlik ishlari mahalla infratuzilmasini yaxshilash, aholining turmush sharoitini yuksaltirish va hududning ijtimoiy-iqtisodiy rivojlanishiga xizmat qilishini qayd etdi.