Buxoro tumanidagi 25-maktab yonida xavfsiz piyodalar o‘tish joyi tashkil etildi

Buxoro tumanidagi 25-sonli umumiy o‘rta ta’lim maktabi yaqinida bir dona qavariq piyodalar o‘tish joyi tashkil etildi. Bu haqda Buxoro viloyati Yo‘l harakati xavfsizligi boshqarmasi Buxoroisharif.uz internet nashriga ma’lum qildi.

Mazkur maktab Buxoro tumani hududidan o‘tuvchi 80V131 avtomobil yo‘lida joylashgan. Maktabga olib boruvchi hududdagi yangi o‘tish joyi o‘quvchilar, ota-onalar va boshqa piyodalarning yo‘lni xavfsiz kesib o‘tishi, transport vositalari tezligini pasaytirish hamda yo‘l-transport hodisalarining oldini olish uchun tashkil etildi.

Shuningdek, haydovchilar maktabga yaqinlashayotganda tezlikni oldindan pasaytirishi uchun maktabdan 100 metr o‘ng va 100 metr chap tomonda jami uchta sun’iy notekislik o‘rnatildi.

Ushbu sun’iy notekisliklar transport vositalari tezligini nazoratli ravishda pasaytirish, haydovchilarning e’tiborini maktab hududiga jalb etish hamda piyodalar, ayniqsa, maktab o‘quvchilarining xavfsizligini ta’minlashga qaratilgan.