Yuk avtomashina haydovchisi 2 o‘ram tabletka uchun jinoiy javobgarlikka tortilishi mumkin

Kuni kecha Buxoro viloyatining “Olot” chegara bojxona posti xodimlari tomonidan tarkibida giyohvandlik vositasi bo‘lgan tabletkalarni Respublikamiz hududiga olib kirishga uringan shaxs to‘xtatib qolindi.

Aniqlanishicha, mazkur bojxona postiga “Turkiya-O‘zbekiston” yo‘nalishida harakatlanib kirib kelgan yuk avtotransport vositasi amaldagi tartibda bojxona ko‘rigidan o‘tkazilganda, transport haydovchisi tomonidan giyohvand moddasi bor dori vositasini noqonuniy tarzda hamda tegishli ruxsatnomalar (retsept) siz mamlakatimiz hududiga olib kirmoqchi bo‘lganlik holati qayd etildi.

Xususan, ko‘rik davomida mazkur avtotransport vositasining kabina qismida, 2 o‘ramdagi “Apranax Plus” nomli tarkibida giyohvandlik moddasi mavjud bo‘lgan tabletka (jami 18 dona) lar yashirib qo‘yilganligi bojxona xodimlari tomonidan fosh etildi.

Ayni damda holat yuzasidan tergovga qadar surishtiruv harakatlari davom etmoqda.