Buxoroda poyezd orqali yuk vagonlarida Tramadol hamda tasnifi ko‘rsatilmagan 474 mln so‘mlik tovarlar olib kirishmoqchi bo‘lishdi

Bojxona qo‘mitasining Buxoro viloyati bojxona boshqarmasi xodimlari tomonidan katta miqdordagi tovar moddiy boyliklarini noqonuniy tarzda olib o‘tishga bo‘lgan urinish bartaraf etildi. Bu haqda tashkilot matbuot xizmati xabar qilmoqda.

“ – Joriy yilning 16-yanvar kuni xorijdan kirib kelgan hamda “Xo‘jadavlat” temir yo‘l chegara bojxona postida poyezd vagonlari inspeksion ko‘rikdan o‘tkazilganda, vagonlarning skanerlangan tasviri va yuk kuzatuv hujjatlarining o‘zaro mos kelmaganligi aniqlandi. Shunga ko‘ra, ular qaytadan tegishli tartibda bojxona ko‘rigidan o‘tkazildi”, – deyiladi viloyat Bojxona boshqarmasi xabarida.

Mazkur partiyadagi yuklar tekshiruvida yuk kuzatuv hujjatlarida qayd etilmagan oshxona asbob-anjomlari, dekorativ tovarlar hamda yumshoq mebellar to‘plami borligi aniqlandi. Shu bilan birga, 3 ta o‘ramda jami 30 dona tabletka ko‘rinishidagi “Tramadol” yozuvli O‘zbekiston Respublikasi hududida erkin muomalada bo‘lishi ta’qiqlangan giyohvandlik vositalari mavjudligi bojxona xodimlari tomonidan fosh etildi.

Umumiy qiymati 474 000 000 so‘mdan ortiq bo‘lgan ushbu noqonuniy tovarlar yuzasidan qonuniy qaror qabul qilingunga qadar vaqtincha saqlovga olingan.

Ayni damda holat yuzasida bojxona organlari tomonidan tergovga qadar surishtiruv ishlari olib borilmoqda.