Buxorodagi barcha arxeolik va turistik obyektlarining 3D-ko‘rinishlari yaratiladi

2022-yilda Buxoro tarixiy markazidagi barcha madaniy meros obyektlarining birga-bir raqamli nusxasini yaratish hamda ba’zi tarixiy obidalarni masofadan turib boshqarish va monitoring qilish imkoniyatini beruvchi sensorli datchiklar, shuningdek, onlayn kameralar o‘rnatish bo‘yicha konsepsiya ishlab chiqilib, Koreya xalqaro hamkorlik agentligi (KOICA) ning grant loyihasiga hujjatlar topshirilgan. Bu haqda Buxoro viloyati hokimligi xabar qilmoqda.

Mazkur loyihaning hududi, qamrovi va texnik-iqtisodiy jihatlari hamda yuqori darajada amalga oshirish imkoniyatlarini o‘rganish maqsadida KOICA mutaxassislaridan iborat ishchi guruhi kuni kecha Buxoroda bo‘ldi.

Tashrif davomida ishchi guruhi Buxoroning tarixiy qadamjolarida bo‘lishdi hamda viloyatdagi tegishli tashkilotlar vakillari bilan loyihani amalga oshirish bilan bilan uchrashuvlar o‘tkazildi.

Eslatib o‘tamiz, 2021-yilda Buxoroning eski shahar qismida 864 — 868-yillarda qurilgan va Somoniylar davri (IX-X asr) me’morchiligining nodir namunalaridan biri bo‘lgan Ismoil Somoniy maqbarasining 3D-nusxasi yaratilib, unga ko‘ra, Ismoil Somoniy maqbarasining “Digital Twin”, 3D-texnologiyalari va geografik ma’lumotlar yordamida birga-bir raqamli nusxasini (egizagini) yaratish hamda “Google Maps” tizimiga biriktirish ishlari Koreya Respublikasi axborot texnologiyalarini rivojlantirish milliy agentligi tomonidan amalga oshirilib, loyihaga umumiy qiymati $150 000 bo‘lgan grand mablag‘lari ajratilgandi.