Yura davriga oid yangi timsoh turining qoldiqlari topildi

Buyuk Britaniyadagi paleontologlar Dorsetda olib borilgan qazilma ishlari davomida Yura davriga tegishli qadimgi timsoh qoldiqlarini topishdi.

“Journal of African Earth Sciences” jurnalida keltirilishicha, ushbu timsoh ruri o‘z oilasining eng qadimgi vakillaridan biri bo‘lgan.

Olimlar uning bosh suyagi, umurtqa pog‘onasi va oyoq-qo‘llarining bir qismini topishga muvaffaq bo‘lishgan.

“Turnersuchus hingleyae” deb nom olgan ushbu turdagi timsohlar Yer yuzida bundan 185 million yil oldin yashagan.

Ma’lumotlarga ko‘ra, ular boshqa timsohlar qatori Yerda Trias davrining oxirida, Turnersuchus hingleyae yashagan vaqtdan taxminan 15 mln yil oldin paydo bo‘lgan.

Uning uzunligi voyaga yetgan odamning tanasi bilan barobar bo‘lgan. Bosh suyagining tuzilishi esa kuchli jag‘ muskullarining mavjudligini va shuning uchun ham katta tishlash kuchiga ega bo‘lganini ko‘rsatadi.

Avvalroq Germaniyada ilm-fanga noma’lum, yuzlab tishlari bo‘lgan pterozavr skeleti topilgani haqida xabar bergan edik.