Prezident Bahouddin Naqshband ziyoratgohida ulamolarga nimalar dedi?

Shavkat Mirziyoyev bugun, 17-fevral kuni mahallalar hayoti va sanoat korxonalari faoliyati bilan tanishish, yangi loyihalarni ishga tushirish hamda viloyatni rivojlantirishning muhim masalalarini muhokama qilish maqsadida Buxoro viloyatiga keldi. Davlatimiz rahbari har safargi an’anaga muvofiq, o‘z tashrifini dastlab Bahouddin Naqshband maqbarasini ziyorat qilishdan boshladi. Bu haqda prezident matbuot xizmati xabar qildi.

Muborak maskanda Qur’on tilovat qilindi. Alloh taolodan o‘tganlarga rahmat, yurtimizga tinchlik-farovonlik tilab duo o‘qildi.

“- Hamma joylarga borib, sohalarga turtki berib, muammolarni hal etib, xalqni rozi qilishga harakat qilyapmiz. Bugun Buxoroga ham yangi marralarni belgilash, odamlarning birini ikki qilish uchun keldik. Hamma xayrli ishlarimizda Allohning o‘zi madadkor bo‘lsin”, – dedi Shavkat Mirziyoyev.

Olimlar bilan suhbatda diniy ta’limni rivojlantirish, jaholatga qarshi ma’rifat bilan kurashish zarurligi ta’kidlandi.

“- Oxirgi yillarda hamma sohalar qatori din bo‘yicha ham ochiqlik, erkinlik berildi, bir nechta ilmiy markazlar tashkil etdik. Lekin bulardan xalqimizga nima manfaat bo‘layapti? Manfaat shunday bo‘lishi kerakki, bu salohiyatni jamiyatga yetkazish kerak. Buxoriy, Moturidiy, Marg‘inoniy kabi buyuk bobolarimiz merosiga tayangan holda jaholatga qarshi ma’rifat bilan kurashish zarur”, – dedi Shavkat Mirziyoyev.

Shuningdek, prezident buning uchun diniy ta’limni amaliyot bilan bog‘lash, ilmiy markazlarimizni dunyoda yetakchilarga aylantirish kerakligini ham ta’kidlab o‘tdi.