Romitanlik yoshlar Milliy gvardiya xodimlari faoliyati bilan tanishishdi

Milliy gvardiya Buxoro viloyati boshqarmasi yoshlar uchun “Ochiq eshiklar kuni” tashkil etdi. Bu haqda tashkilot matbuot xizmati xabar qildi.

Xabarda aytilishicha, Romitan tumanida istiqomat qiluvchi harbiylik kasbiga qiziquvchi voyaga yetmagan mahalla yoshlari hamda maktab o‘quvchilari uchun Romitan tumani Qo‘riqlash bo‘limida “Ochiq eshiklar kuni” tadbiri tashkil etildi.

Yoshlarimizni vatanparvarlik ruhida tarbiyalash, milliy armiyamizga jismonan baquvvat va maʼnan yetuk yoshlar zarurligi, harbiy xizmat har bir Oʻzbekiston fuqarosi uchun muqaddas burch ekani haqidagi tushunchani hamda bu boradagi nazariy-amaliy koʻnikmalarni mustahkamlash maqsadida tashkil etilgan tadbirga harbiy xizmatga ishtiyoqmand yoshlar jalb qilindi.

Tadbir ishtirokchilari xodimlarning xizmat faoliyati, aqliy va jismoniy salohiyat kasb etadigan harbiylik kasbining naqadar sharafli ekanligini oʻz koʻzlari bilan koʻrib, oʻzlarida ham vatanparvarlik tuygʻulari mujassam ekanligini yashirib oʻtirishmadi. Shuningdek, yoshlar muassada xodimlarga yaratilgan shart-sharoitlar bilan tanishdi.