Buxorolik gimnastikachilaridan yana bir gʻalabali yurish

Oʻzbekistonda bolalar sportini rivojlantirish, ayniqsa, qizlarni sportga keng jalb qilishga katta e‘tibor qaratilayotgani ayni haqiqatdir. 

Jumlada, viloyatimizning tuman (shahar) larida bunyod etilgan zamonaviy sport majmualarida qizlar sportning badiiy gimnastika turi bilan shug’ullanib kelishmoqda.

Buxoroda ham badiiy gimnastika sport turi boʻyicha oʻziga xos maktab shakllangan bo‘lib, gimnastikachilarimiz xalqaro va Oʻzbekiston chempionatlarida muvaffaqiyat qozonayotgani, viloyatimizda esa shunday turnirlar muntazam tashkil etilayotgani buning yorqin ifodasidir.

2023-yilning 21-fevralidan 25-fevraliga qadar Jizzax viloyatida 2008—2010-yillarda tugʻilgan qizlar oʻrtasida boʻlib oʻtgan Oʻzbekiston chempionatida bizning buxorolik vakillarimiz ishtirok etishdi.

Buxoro viloyati yoshlar siyosati va sporti bosh boshqarmasining maʼlum qilishicha, musobaqada saralash 3 bosqichda oʻtkazilib, Buxoro viloyati terma jamoasi esa unda yuqori natijalarga erishgan.

Xususan, viloyatimiz qizlari jamoaviy koʻpkurash bahslarida 1-oʻrinni, jamoaviy koptok bilan bajariladigan mashqlarda esa 2-oʻrinni qoʻlga kiritishdi.

Tahririyatimiz nomidan sportimizning buxorolik malikalarini ushbu muvaffaqiyatlari bilan muborakbod etamiz.