O‘zbekistonda ikki o‘rinli kichik samolyotlar ishlab chiqarilishi mumkin

O‘zbekistonda yengil samolyot ishlab chiqarish yo‘lga qo‘yilishi mumkin. Bu masala 18-fevral kuni Transport vaziri o‘rinbosari Jasurbek Choriyev va Vengriyaning Magnus Aircraft Zrt. kompaniyasi bosh ijrochi direktori Laszlo Boros o‘rtasidagi uchrashuvda muhokama qilindi.

Vazirlik axborot xizmatining ma’lum qilishicha, uchrashuvda kompaniya ishlab chiqarayotgan ikki o‘rinli yengil samolyotlarni O‘zbekistonda mahalliylashtirish imkoniyati ko‘rib chiqilgan. Xususan, Magnus Fusion 212 rusumidagi modelni mamlakatda ishlab chiqarish istiqbollari muhokama markazida bo‘lgan.

Mazkur samolyot kompozit materiallardan tayyorlanadi va asosan o‘quv hamda sport parvozlari uchun mo‘ljallangan. U 100–141 ot kuchiga ega dvigatel bilan jihozlanadi, maksimal tezligi soatiga 280 kilometrgacha yetadi. Uchish masofasi esa 800–1000 kilometrni tashkil etadi.

Kompaniya vakillari hozirda AQSh, Xitoy, Keniya, Nigeriya, Serbiya va Yaqin Sharq mamlakatlarida faoliyat yuritayotgani ta’kidlandi. Muzokaralar yakunida loyiha bo‘yicha texnik va iqtisodiy jihatlarni batafsil o‘rganish bo‘yicha kelishuvga erishilgani bildirildi.

Ma’lumot uchun, Magnus Aircraft Zrt. — innovatsion yengil samolyotlarni loyihalash, ishlab chiqarish va sotish bilan shug‘ullanuvchi Vengriya kompaniyasi. Uning bosh qarorgohi Pogani shahrida, Pech-Pogani xalqaro aeroporti yaqinida joylashgan bo‘lib, ishlab chiqarish maydoni qariyb 8 ming kvadrat metrni tashkil etadi.