Buxoroda bolalarga noqonuniy diniy ta’lim berib kelgan “domla” qo‘lga olindi

Buxoro viloyatida huquq-tartibot idoralari tomonidan o‘tkazilgan tezkor tadbir davomida voyaga yetmagan bolalarga noqonuniy ravishda diniy saboq berib kelgan shaxs qo‘lga olindi.

Olingan ma’lumotlarga ko‘ra, asli surxondaryolik bo‘lgan, 1968-yilda tug‘ilgan fuqaro Buxoro shahrida ijarada yashab kelayotgan xonadonida hech qanday diniy ma’lumotga ega bo‘lmay turib, yashirincha «hujra» tashkil qilgan. U qonunga xilof ravishda voyaga yetmagan bolalarga diniy ta’lim berish bilan shug‘ullanib kelgan.

Ushbu “xizmati” evaziga u ota-onalardan har bir bola uchun oyiga:

• 100 AQSh dollari (yoki 1 mln so‘m) miqdorida moddiy mablag‘ olib turgan.

Tadbir davomida mazkur xonadonda 7 nafar voyaga yetmagan bola saqlab kelinayotgani aniqlandi. Ulardan 2 nafari Buxoro viloyatidan, 5 nafari esa Surxondaryo viloyatidan olib kelingan. Bolalar maktabdagi dunyoviy ta’limdan uzilgan holda, sanitariya talablariga javob bermaydigan sharoitda yashab kelishgan.

Mazkur holat yuzasidan quyidagi choralar ko‘rilmoqda:

1. Gumonlanuvchiga nisbatan: O‘zbekiston Respublikasi Jinoyat kodeksining 229 prim 2-moddasi, 2-qismi (Diniy ta’limotdan saboq berish tartibini buzish) bilan jinoyat ishi qo‘zg‘atilib, tergov harakatlari olib borilmoqda.
2. Ota-onalarga nisbatan: O‘z farzandlarining ta’lim-tarbiyasiga mas’uliyatsizlik bilan yondashgan hamda ularning dunyoviy ta’lim olishiga to‘sqinlik qilgan ota-onalarga nisbatan Ma’muriy javobgarlik to‘g‘risidagi kodeksning 47-moddasiga asosan tegishli jazo choralari ko‘rilmoqda.

“Farzandlarimizning munosib ta’lim-tarbiya olishi bevosita ota-onaning diqqat-e’tibori va mas’uliyatiga bog‘liq. Noqonuniy ta’lim o‘choqlari yoshlarning kelajagiga jiddiy xavf tug‘diradi”.