Saudiya Arabistoni o‘zbekistonlik shifokor va hamshiralarni ishga taklif qilmoqda

Saudiya Arabistoni dastlabki bosqichda 100 nafar o‘zbekistonlik shifokor va hamshiralarni mamlakatdagi xususiy tibbiyot muassasalariga ishga qabul qilishni rejalashtirmoqda. Xorijiy tibbiyot mutaxassislariga ehtiyoj yuqori bo‘lgani bois ularga munosib mehnat sharoitlari va ijtimoiy kafolatlar taklif etilmoqda.

Mazkur masala O‘zbekistonning Saudiya Arabistonidagi elchixonasi diplomatlari, Saudiya Arabistoni Sog‘liqni saqlash vazirligi Kadrlar boshqarmasi rahbari hamda Vigour Locomotion Medical Center tibbiy reabilitatsiya markazi boshqaruv direktori Vadha bint Saad al-Hajriy o‘rtasida bo‘lib o‘tgan uchrashuvda muhokama qilindi.

Muloqot davomida sog‘liqni saqlash sohasidagi ikki tomonlama hamkorlikni kengaytirish, o‘zbekistonlik shifokor va hamshiralarni Saudiya Arabistonining xususiy klinikalariga ishga jalb etish hamda investitsiyaviy loyihalarni amalga oshirish masalalari ko‘rib chiqildi.

Saudiya tomoni ma’lumotiga ko‘ra, mamlakatdagi xususiy shifoxonalar va tibbiyot markazlarida qariyb 4,5 ming nafar xorijiy shifokor va hamshiraga ehtiyoj mavjud. Shu sababli birinchi bosqichda 100 nafar o‘zbekistonlik tibbiyot xodimini ishga qabul qilish taklifi ilgari surilgan.

Taklif etilayotgan mehnat shartlariga ko‘ra, ish beruvchi xodimlarning rasmiy yashash va ishlash ruxsatnomasi — iqoma, turar joy, ichki transport xarajatlari, tibbiy sug‘urta hamda har yili aviachipta xarajatlarini to‘liq qoplab beradi.

Maosh miqdori mutaxassisning tajribasi va kasbiga qarab belgilanadi. Yosh shifokorlarga oyiga 4 500–5 600 Saudiya riali, ya’ni taxminan 1 200–1 500 AQSh dollari miqdorida ish haqi taklif etiladi. Tajribali shifokorlar esa 5 600–9 300 riyal yoki 1 500–2 500 dollar atrofida maosh olishi mumkin. Hamshiralar uchun esa oylik 3 000–3 750 Saudiya riali, ya’ni 800–1 000 AQSh dollari etib belgilangan.

Talab asosan oilaviy shifokorlar, akusher-ginekologlar, fizioterapevtlar, dermatologlar, bolalar psixologlari hamda yuz-jag‘ jarrohlari kabi mutaxassisliklarga qaratilgan.

Uchrashuvda Saudiya vakillari o‘zbekistonlik tibbiyot xodimlarining kasbiy salohiyati va mehnat intizomini yuqori baholashlarini ta’kidladi. Shu bilan birga, ingliz tilini yaxshi biladigan va kasbiy etika me’yorlariga qat’iy amal qiladigan mutaxassislarga talab ayniqsa yuqori ekani qayd etildi.

Muzokaralar davomida Ar-Riyod provinsiyasida zamonaviy ko‘p tarmoqli sog‘lomlashtirish markazini qurish loyihasi ham taqdim etildi. Loyiha amalga oshirilsa, unga O‘zbekistondan quruvchilar, muhandislar, elektriklar, santexniklar, duradgorlar, haydovchilar va boshqa mutaxassislarni jalb qilish, keyinchalik esa yangi ish o‘rinlarini yaratish rejalashtirilmoqda.

Shuningdek, Saudiya Arabistoni sog‘liqni saqlash vaziri boshchiligidagi delegatsiya joriy yil iyul oyi oxirida O‘zbekistonga tashrif buyurishi va tibbiyot sohasidagi hamkorlikni yanada kengaytirish yuzasidan qator uchrashuvlar o‘tkazishi kutilmoqda.

So‘nggi yillarda O‘zbekiston va Saudiya Arabistoni o‘rtasida sog‘liqni saqlash sohasidagi hamkorlik izchil rivojlanib bormoqda. O‘zbekistonlik shifokor va hamshiralar uchun yaratilayotgan bunday imkoniyatlar nafaqat xorijda qonuniy mehnat qilish, balki zamonaviy tibbiyot tizimida tajriba orttirish imkonini ham beradi.

Xorijda ishlashni rejalashtirayotgan mutaxassislar uchun til bilimi, kasbiy malaka va xalqaro standartlarga mos ishlash ko‘nikmalari tobora muhim ahamiyat kasb etmoqda. Shu bilan birga, bunday hamkorlik ikki davlat o‘rtasida tibbiyot sohasida tajriba almashish, investitsiyalarni jalb etish va malakali kadrlar salohiyatini oshirishga ham xizmat qiladi. Kelgusida bu kabi loyihalar yanada ko‘payishi o‘zbekistonlik mutaxassislar uchun yangi ish o‘rinlari va kasbiy rivojlanish imkoniyatlarini kengaytirishi kutilmoqda.