Buxoroda “Toza havo” oyligining ikkinchi bosqichi o‘tkazildi

Buxoro tumani va Buxoro shahrida atmosfera havosini muhofaza qilishga qaratilgan “Toza havo” oyligining ikkinchi bosqichi o‘tkazildi. Bu haqda Buxoro viloyati Ekologiya va iqlim o‘zgarishi bosh boshqarmasi Buxoroisharif.uz internet nashriga ma’lum qildi.

Buxoro tumanidagi tadbir atrof-muhit musaffoligini ta’minlash, atmosfera havosini ifloslanishdan muhofaza qilish hamda ekologik madaniyatni yuksaltirish maqsadida tashkil etilgan.

Jarayon davomida transport vositalaridan atmosferaga chiqarilayotgan zararli gazlar miqdorini kamaytirish, ekologik me’yorlarga rioya etilishini ta’minlash va fuqarolar o‘rtasida tushuntirish-targ‘ibot ishlarini olib borishga e’tibor qaratilgan.

Oylikning ikkinchi bosqichi Buxoro shahrida ham o‘tkazilgani qayd etildi. Shu tariqa tadbirlar viloyat markazi va unga yondosh tumanni qamrab oldi.

Har ikki hudud bo‘yicha e’lon qilingan fotoalbomlarda mutaxassislarning yo‘llarda transport vositalarini ko‘zdan kechirayotgani va nazorat tadbirlarini olib borayotgani aks etgan.

“Toza havo” oyligi doirasidagi ishlar avtomobillardan chiqayotgan zararli gazlarni kamaytirish va haydovchilarning ekologik talablar bo‘yicha xabardorligini oshirishga yo‘naltirilgan.