Buxoroda avgust oyida 655 ta ekologik huquqbuzarlik aniqlandi

Buxoro viloyatida 2026-yil avgust oyida o‘tkazilgan ekologik nazorat tadbirlari davomida 655 ta qonunbuzilish holati aniqlandi. Bu haqda Buxoro viloyati Ekologiya va iqlim o‘zgarishi bosh boshqarmasi Buxoroisharif.uz internet nashriga ma’lum qildi.

Huquqbuzarliklar bosh boshqarma davlat inspektorlari tomonidan aniqlangan. Qonunbuzarlarga nisbatan jami 774 million 475 ming so‘m miqdorida jarima qo‘llanib, tabiatga yetkazilgan zarar 25 million 163 ming so‘m deb belgilandi.

Aniqlangan holatlarning eng katta qismi chiqindilarni nazorat qilish sohasiga to‘g‘ri keldi — bu yo‘nalishda 353 ta huquqbuzarlik qayd etildi. Atmosfera havosini muhofaza qilish bo‘yicha esa 205 ta qonunbuzilish holati aniqlandi.

Suv va yer obyektlarini muhofaza qilish sohasida 57 ta, o‘simlik dunyosini muhofaza qilish yo‘nalishida 37 ta huquqbuzarlik aniqlangan. Hayvonot dunyosini muhofaza qilish bilan bog‘liq 3 ta qonunbuzilish holati qayd etildi.

Bosh boshqarma ekologik nazorat tadbirlari tabiat resurslarini muhofaza qilish va atrof-muhitga zarar yetkazilishining oldini olishga qaratilganini bildirdi.