Shofirkonda U-14 voleybol bo‘yicha viloyat kubogi g‘oliblari aniqlandi

Shofirkon tumanidagi “Revgar” sport majmuasida U-14 yosh toifasidagi o‘g‘il va qiz bolalar o‘rtasida voleybol bo‘yicha viloyat kubogi musobaqasi o‘tkazildi. Bu haqda Buxoro viloyati Ichki ishlar boshqarmasi Buxoroisharif.uz internet nashriga ma’lum qildi.

Musobaqadan ko‘zlangan asosiy maqsad yoshlar o‘rtasida voleybolni yanada ommalashtirish, iqtidorli yosh sportchilarni aniqlash hamda ularning mahoratini oshirishdan iborat bo‘ldi.

Murosasiz va qiziqarli kechgan bahslarda Buxoro viloyatining turli hududlaridan kelgan yosh voleybolchilar o‘z mahoratini namoyish etdi.

Qizlar o‘rtasidagi bahslar yakuniga ko‘ra, Kogon tumani jamoasi 1-o‘rinni egalladi. Shofirkon tumani jamoasi 2-o‘rin, Buxoro shahri jamoasi esa 3-o‘rin sohibi bo‘ldi.

O‘g‘il bolalar o‘rtasida Shofirkon tumani jamoasi 1-o‘rinni qo‘lga kiritdi. Qorako‘l tumani jamoasi 2-o‘rinni, Jondor tumani jamoasi 3-o‘rinni egalladi.

Musobaqa yakunida g‘olib va sovrindor jamoalar munosib taqdirlandi.