“Jayron” pitomnigidagi foto-qopqon yo‘qolib borayotgan ot turlarini tasvirga oldi – video

Davlat ekologiya qo‘mitasi tasarrufidagi “Jayron” Buxoro ixtisoslashgan pitomnigiga o‘rnatilgan foto-qopqon noyob tur bo‘lgan Prjevalskiy otlarini tasvirga oldi.

Ushbu tur O‘zbekiston Respublikasi faunasi uchun xos bo‘lmagan tur hisoblanadi. Xalqaro “Qizil kitob” ga D mezoni bo‘yicha (EN) “Endangered” toifasida, ya’ni “Yo‘q bo‘lib ketayotgan” tur sifatida kiritilgan.

Dastlab Prjevalskiy otlari Buxoro ixtisoslashtirilgan “Jayron” pitomnigiga 1987-yilda Moskva va Sankt-Peterburg hayvonot bog‘laridan 2 bosh olib kelingan bo‘lib, tutqunlikda saqlab ko‘paytirilib, keyinchalik 1992-yilda pitomnik hududiga qo‘yib yuborilgan.

Kuzatuvlarga ko‘ra, pitomnik hududidagi ayni vaqtdagi soni Prjevalskiy otlari 18 boshni tashkil qiladi.

Eslatib o‘tamiz, “Jayron” pitomnigi Qizilqum cho‘lining janubi-g‘arbida joylashgan bo‘lib, 40 yildan ortiqroq vaqt mobaynida bu yerda kamyob jonivorlar ko‘paytirib kelinmoqda. Pitomnikning faoliyati tufayli jayronlar, qulonlar, Prjevalskiy otlari, buxoro tog‘ qo‘ylari, buxoro bug‘ulari va boshqa jonivorlar populyatsiyasi tobora o‘sib bormoqda.