Qozogʻistonda prezident saylovi: Tokayev gʻalaba qozondi

Qozogʻistonda boʻlib oʻtgan navbatdan tashqari prezident saylovida amaldagi davlat rahbari Qasim-Jomart Toqayev saylovchilarning 85 foizdan ortiq ovozini qoʻlga kiritdi. Bugun Markaziy saylov komissiyasi saylovlarning dastlabki natijalarini sarhisob qiladi, – deya xabar bermoqda «Sputnik Qozogʻiston» nashri.

Qayd etilishicha, Qozogʻistonda 11,95 million saylovchi bor. Ularning 69,43% ovoz berish jarayonlarida ishtirok etdi.

Respublika boʻyicha 10 101 ta saylov uchastkasi oʻz faoliyatini olib bordi, shu jumladan xorijda 53 mamlakatda 68 ta saylov uchastkasi ochildi.

Saylovchilarning ishtiroki boʻyicha eng yuqori koʻrsatkich Jetisu viloyati (81,42%) va Qiziloʻrda viloyatida (81,07%) qayd etildi. Mazkur koʻrsatgich Ostonada 48,6% ni, Olmaotada esa 28,72% ga teng boʻldi. Aksariyat hududlarda saylovchilarning ishtiroki 70% dan oshdi.

Saylovda jami 641 nafar xalqaro kuzatuvchi akkreditatsiya qilingan. Saylovlarni kuzatish boʻyicha eng yirik tashkilotlardan biri MDH mamlakatlari missiyasi boʻlib, uning tarkibiga MDH ning 8 ta davlatidan 174 nafar kuzatuvchi kiradi.

Ular Ozarbayjon, Armaniston, Belarus, Qirgʻiziston, Rossiya, Tojikiston, Turkmaniston, Oʻzbekiston, MDH Parlamentlararo Assambleyasi, KXSHT Parlament Assambleyasi, Belorus va Rossiya Ittifoqi parlament assambleyasi, shuningdek MDH Ijroiya qoʻmitasi vakillari hisoblanadi.

Maʼlumot uchun, saylov uchastkalarida ovoz berish jarayoni mahalliy vaqt bilan soat 07:00 da boshlanib, 20:00 ga qadar davom etdi.