Talabalar Buxoro neftni qayta ishlash zavodida amaliyot o‘tashdi

Kuni kecha neft va gaz yo‘nalishida ta’lim olayotgan oliy o‘quv muassasalari talabalari uchun Buxoro neftni qayta ishlash zavodi bazasida amaliy mashg‘ulotlar tashkil etildi.

Xususan, ana shunday sayyor darslar I. M. Gubkin nomidagi Rossiya davlat neft va gaz universiteti Toshkent filialining “Neft-gaz va qayta ishlangan mahsulotlarni tashish va saqlash obyektlaridan foydalanish va ularga xizmat ko‘rsatish yo‘nalishi” 4-bosqich talabalari uchun bo‘lib o‘tdi.

Xom-ashyo va tayyor mahsulotlar sexiga qarashli obyektlarda va interfaol jihozlangan o‘quv xonalarida tashkillashtirildi. Ko‘p yillik tajribaga ega ustoz xodimlar bo‘lajak mutaxassislarni zavod estakadasi va sig‘imlar parkining ish faoliyati, mahsulotlarni tashish va saqlash texnologiyalari bilan tanishtirishdi.

Shuningdek, bundan bir necha kun oldin Buxoro davlat universitetining “Kimyoviy texnologiya”, “Neft-gaz kimyo sanoati” texnologiyasi ta’lim yo‘nalishi 1-bosqich talabalari uchun ham mahorat darslari o‘tkazildi.

Dastlab zavodning markaziy tahlilxonasida bo‘lgan BDU talabalarini malakali xodimlar bu yerda ishlab chiqariladigan mahsulotlar, olib boriladigan laboratoriya tajribalari, ishlash tizimlari bilan tanishtirishdi.

Ta’kidlash joizki, Buxoro NQIZ nafaqat talabalar, balki ustoz-pedagoglar uchun ham tajriba almashish va malaka oshirish maskani hisoblanadi. Buning uchun esa talabalar va institut pedagoglari uchun yetarli sharoitlar yaratilgan.

Bo‘lajak kadrlarning bilimlarini ishlab chiqarish jarayonlaridagi texnika va texnologiyalar muhitida yanada mustahkamlash, o‘quv jarayoni sifatini oshirish maqsadida “O‘zbekneftgaz” AJ Boshqaruvi raisi Mehriddin Abdullayevning topshirig‘i bilan tizim korxonalarida amalga oshirilayotgan talabalarning sayyor o‘quv mashg‘ulotlari davom etmoqda.