«Hududgaz Toshkent» filiali rahbari qamoqqa olingani aytilgan yigʻilishda Sardor Umurzakov «Buxoro viloyati HETK» AJ rahbarining uyidagi “svet” ni oʻchirishni buyurib, Buxoro SSB rahbariga jiddiy tanbeh berdi

Gaz va elektr muammosi bo‘yicha qonunbuzilishga yo‘l qo‘ygan ayrim rahbarlar qamoqqa olingan.

Bir necha soat oldin aholi va iqtisodiyot tarmoqlarini energiya resurslari bilan mutanosib ta’minlash masalalari bo‘yicha Respublika shtabining navbatdagi yig‘ilishi bo‘lib o‘tdi. Uni har doimgidek Oʻzbekiston Respublikasi Prezidenti Administratsiyasi rahbari Sardor Umurzakov tanqidiy ruhda olib bordi.

Yigʻilishda, jumladan, qonunbuzilishga hamda mas’uliyatsizlikka yo‘l qo‘ygan soha rahbarlaridan ayrimlariga nisbatan jinoyat ishi qo‘zg‘atilgani va qamoqqa olingani ma’lum qilindi.

Xususan, energiya resurslari bilan ta’minlash sohasida aniqlangan qonun buzilish holatlari yuzasidan Bosh prokuror Nig‘matilla Yo‘ldashev ayrim ma’lumotlarni aytib oʻtdi.

Maʼlum boʻlishicha, «Hududgazta’minot» AJ ning Toshkent viloyati bo‘yicha tarkibiy bo‘linmasi bo‘lgan «Hududgaz Toshkent» filiali direktori Muzaffar Aliyevga nisbatan jinoyat ishi ochilgan hamda ehtiyot chorasi sifatida qamoqqa olingan.

Shuningdek, «Yangiyo‘l tumangaz» rahbari Umid To‘ychiyev va «Guliston tuman elektr tarmoqlari korxonasi» sobiq rahbari Furqat Shodmonqulovga ham jinoyat ishi ochilib, ehtiyot chorasi sifatida qamoqqa olingan.

Ushbu yigʻilishdagi yana bir eʼtiborli jihat shundaki, ishonchli manbaning xabariga ko‘ra, «Romitan elektr tarmoqlari korxonasi» rahbari Xurshid Salomov nogironligi bor bolalar maktab–internatini tarmoqdan uzgani uchun hamda oʻz ishiga masʼuliyat bilan yondashmagani uchun «Buxoro viloyati hududiy elektr tarmoqlari korxonasi» AJ rahbari Bahodir Hayotovning yashash xonadonini elektr tarmog‘idan uzishga topshiriq berilgan.

S. Umurzakov raisligidagi selektorda Buxoro viloyat SSB rahbari Askar Bahorovning ham jiddiy tanbeh eshitgani aytilmoqda