Buxoro neft va gaz sanoati kolleji maktab oʻquvchilarini I. M. Gubkin nomidagi Rossiya davlat neft va gaz universitetiga kirishi uchun bepul tayyorlaydi

Joriy yilning 16-dekabr kuni Ivan Mixaylovich Gubkin nomidagi Rossiya davlat neft va gaz universitetining Buxorodagi hududiy tayyorlov bo‘limining tantanali ochilish marosimi bo‘lib o‘tdi.

Buxoro neft va gaz sanoati kollejida boʻlib oʻtgan tadbirda Buxoro viloyati hokimining o‘rinbosari Mirali Hamroyev, «O‘zbekneftegaz» AJ Boshqaruvi raisi o‘rinbosari Shuhrat Dauletiyarov, I. M. Gubkin nomidagi Rossiya davlat neft va gaz (Milliy tadqiqot universiteti) universiteti rektori Viktor Martinov, I. M. Gubkin nomidagi Rossiya davlat neft va gaz universitetining Toshkent shahridagi filiali ijrochi direktori Abdulla Magʻrupov, Buxoro viloyati Kasbiy ta’limni rivojlantirish va muvofiqlashtirish boshqarmasi hamda Xalq ta’limi boshqarmasining rahbarlari va mutaxassislari, umumta’lim maktablari, akademik litseylar, kasb-hunar kollejlari va texnikumlar direktorlari ham ishtirok etdi.

Shuningdek, shu kuni Buxoro neft va gaz sanoati kolleji negizida zarur asboblar va jihozlar bilan to‘liq ta’minlangan zamonaviy o‘quv-amaliy laboratoriyasi ham ochildi.

Qayd etish kerakki, Buxoro neft va gaz kolleji negizidagi tayyorlov filiali uchun bosh oʻquv binosining 4-qavati «Oʻzbekneftgaz» AJ koʻmagida mukammal rekonstruksiya qilindi hamda fizika, matematika, rus tili kabinetlari, mustaqil ta’lim xonasi, o‘qituvchi va metodistlar xonasi to‘ldirildi, o‘quv xonalari va kabinetlar zamonaviy partalar, mebel va zarur narsalar bilan jihozlandi.

Bu yerda umumta’lim maktablarining 10-, 11-sinflari, akademik litsey, kasb-hunar kolleji va texnikumlar o‘quvchilari uchun matematika, fizika va rus tili fanlaridan bepul tayyorlov kurslari tashkil etiladi. Tinglovchilarni saralash esa tanlov asosida amalga oshiriladi.

O‘quv mashg‘ulotlarini o‘tkazish uchun Rossiya Federatsiyasining tajribali, Buxoro shahrining yuqori malakali o‘qituvchilari jalb etilgan. Ushbu loyiha I. M. Gubkin nomidagi Rossiya davlat neft va gaz universitetining Toshkent filialiga o‘qishga kirishni xohlovchilar uchun noyob imkoniyat yaratadi.