Buxoroda qancha yer maydoni o‘zboshimchalik bilan egallab olingan?

Kadastr agentligi Buxoro viloyat boshqarmasi va uning tasarrufidagi tuman, shahar bo‘limlari inspektorlari tomonidan 2022-yilning 11 oyi davomida viloyatda 864 ta holatda 135,1 gektar yer maydoni o‘zboshimchalik bilan egallab olingani aniqlangan. Bu haqida tashkilot axborot xizmati ma’lum qildi.

Ta’kidlanishicha, eng ko‘p qonunbuzarliklar G‘ijduvon tumani (114), Olot tumani (95) va Buxoro tumanida (88) qayd etilgan. Noqonuniy egallab olingan yerlar hajmi bo‘yicha Buxoro tumani (54 gektar), Qorovulbozor tumani (24 gektar) va Olot tumani (13,75 gektar) «peshqadamlik» qilmoqda.

Shuningdek, Kadastr agentligi tomonidan o‘tkazilgan nazorat tadbirlarida jami 306 ta holatda yer tuzish loyihalaridan o‘zboshimchalik bilan chetga chiqish, 1 722 ta holatda ko‘chmas mulkka bo‘lgan huquqni davlat ro‘yxatidan o‘tkazish uchun o‘z vaqtida murojaat etmaslik, 15 ta holatda sug‘oriladigan yerlarni o‘zboshimchalik bilan egallab olish bo‘yicha choralarni ko‘rmaslik holati aniqlangan.

Yer maydonlarini o‘zboshimchalik bilan egallab olingan holatlar bo‘yicha o‘tkazilgan nazorat tadbirlarida 215 ta holatda qonunbuzarlik ixtiyoriy bartaraf etilgan, 697 ta holat bo‘yicha sudlarga da’vo arizasi kiritilgan.