Qoraqalpog‘iston voqealariga gumonlanuvchilar saqlanayotgan Buxorodagi qamoqxonaga faollar tashrif buyurdi

Joriy yilning 23-dekabr kuni Qoraqalpog‘iston Respublikasida yuz bergan holat va voqealarni o‘rganish hamda ular yuzasidan mustaqil tekshiruv o‘tkazish bo‘yicha komissiya a’zolari Feruza Eshmatova boshchiligida Buxoro viloyatidagi 4-son Tergov hibsxonasiga tashrif buyurishdi. Tashrif davomida hibsxonadagi shart-sharoitlar, isitish tizimi va oziq-ovqat ta’minoti o‘rganildi.

Shuningdek mustaqil komissiya a’zolari ushbu Tergov hibsxonasida saqlanayotgan A. Turdanov, N. Nayimov, A. Nuratdinov, B. Kadirbergenov, B. Seytnazarov hamda L. Kallixanovalar bilan uchrashdi.

Uchrashuv davomida ular saqlash shart-sharoitlaridan hech qanday e’tirozlari yo‘qligini, ta’minotlari yaxshiligini, shu bilan bir qatorda sud jarayoni ham qonuniy tarzda o‘tkazilayotganligini ma’lum qilishgan, – deya xabar bermoqda O‘zbekiston Respublikasi Oliy Majlisining Inson huquqlari bo‘yicha vakili web-sayti.