Buxoro shahridagi 15-IDUM da “remont” uchun ota-onalardan pul yig‘ilgani rostmi?

Kecha 28-apel kuni Telegramdagi “Potrebitel Buxara plyus” kanalida Buxoro shahridagi 15-IDUM haqida murojaat eʼlon qilindi. Unda maktabdagi sinflarning birining Telegram guruhidan olingan skrinshot ilova qilingan:

Ushbu holatga aniqlik kiritish maqsadida Buxoro viloyat maktabgacha va maktab ta’limi boshqarmasi tomonidan o‘rganish o‘tkazildi.

O‘rganish jarayonida ushbu maktab ma’muriyati tomonidan maktabni ta’mirlash uchun o‘qituvchilarga hech qanday topshiriq berilmaganligi, taklif ota-onalar tashabbusi bilan bir sinfdagi o‘quvchilarning ota-onalar Telegram guruhi orqali tarqatilganligi ma’lum bo‘ldi.

Shuni alohida eslatib o‘tmoqchimizki, amaldagi qonunchiligimizga ko‘ra, umumta’lim muassasalarini moliyalashtirish byudjet mablag‘lari hisobidan amalga oshiriladi. Har bir maktab yil davomida tasdiqlangan xarajatlar smetasi doirasida mablag‘ oladi. Maktab o‘qituvchilari va rahbarlariga maktab ta’miri uchun ota-onalardan pul yig‘ish taqiqlangan. Faqatgina qonunchilikda ruxsat etilgan homiylik yordamlari berilishi mumkin.

Shuningdek, o‘qituvchi va ta’lim tizimida faoliyat olib borayotganlardan maktab ta’miri uchun, tadbirlar o‘tkazish yoki boshqa bahonalar bilan pul to‘plash, yoki ish haqlaridan mablag‘ ushlab qolinishiga yo‘l qo‘yilmaydi.