Xorijiy turoperatorlar uchun Buxoro bo‘ylab infotur tashkil etildi

Buxoro viloyati delegatsiyasining 2024–2025-yillarda Indoneziya, Malayziya va Singapur davlatlarida amalga oshirgan tashriflari chog‘ida ikki tomonlama erishilgan manfaatli kelishuvlar natijasida mazkur davlatlarning turoperatorlari uchun Buxoro viloyatiga maxsus infotur dasturini amalga oshirish rejalashtirilgan edi.

Kelishuvlar natijasi o‘laroq, ayni damda Malayziya, Indoneziya va Singapur davlatlaridan tashrif buyurgan 20 nafar turoperatorlar Buxoroda bo‘lib turishibdi.

Tashrifning ilk kunida mehmonlar Buxoro temir yo‘l vokzalidan milliy kuy-ohanglar ostida tegishli mas’ullar ishtirokida tantanali kutib olindi.

Delegatsiya vakillari kun davomida ko‘hna kent — Buxoroning tarixiy-madaniy yodgorliklari bilan yaqindan tanishishdi.

Xususan, qadimiy Labi Hovuz ansamblidan boshlangan sayohat davomida mehmonlar qadimiy toqlar, Poyi Kalon majmuasi qolaversa, Buxoroning ertaknamo eski shahar qismini hayrat va havas bilan tomosha qilishdi.

Bugun, 12-fevral kuni erta tongdan xorijiy turoperatorlar o‘z sayohatlarini “Bahouddin Naqshband” majmuasini ziyorat qilishdan boshlashdi. Ularga B. Naqshbandning hayoti, islom dini rivojiga qo‘shgan ulkan hissasi, shuningdek, ziyorat obyektlarida yaratilgan shart-sharoitlar xususida batafsil so‘z yuritildi.

Navbatdagi sayohat obyekti — Sitorai Mohi-Xosa majmuasi bo‘lib, undagi yaratilgan shart-sharoitlar, saroydagi sharqona va yevropacha bezaklar, shuningdek, muzeydagi qadimiy va noyob eksponatlar bilan yaqindan tanishish imkoniyatiga ega bo‘lishdi.