Buxoroda davlat xizmatchilari uchun chuqurlashtirilgan tibbiy ko‘rik o‘tkazildi

Kecha, 6-yanvar kuni Buxoro shahrida joylashgan Diagnostika markazida viloyat rahbarlari ishtirokida keng qamrovli chuqurlashtirilgan tibbiy ko‘rik tashkil etildi. Bu haqda viloyat sog‘liqni saqlash boshqarmasi xabar bermoqda.

Mazkur ko‘rikda viloyat hokimi o‘rinbosarlari, tuman va shahar hokimlari o‘rinbosarlari hamda viloyat boshqarma boshliqlari erta tongdan viloyatning yetakchi malakali mutaxassislari hamda Buxoro davlat tibbiyot instituti professor-o‘qituvchilari ishtirokida to‘liq tibbiy tekshiruvlardan o‘tdilar.

Ma’lumotlarga ko‘ra, jami 72 nafar hokim o‘rinbosarlari va viloyat boshqarma boshliqlari tibbiy ko‘rikdan o‘tkazildi. Ko‘rik jarayoniga 7 nafar viloyat darajasidagi yuqori malakali mutaxassis hamda 5 nafar Buxoro davlat tibbiyot institutining professor va o‘qituvchilari jalb etildi.

Tibbiy ko‘rik davomida mobil poliklinika, ko‘chma stasionar DELFT rentgen apparati, Qon banki, ultratovush tekshiruvi (UTT), elektrokardiografiya (EKG) hamda laboratoriya xizmatlari to‘liq yo‘lga qo‘yildi.

Chuqurlashtirilgan tibbiy ko‘rik natijalariga ko‘ra, 64 nafar hokim o‘rinbosarlari hamda viloyat boshqarma boshliqlarida jami 114 ta turli kasallik holatlari aniqlandi. Shundan 55 nafar davlat fuqarolik xizmatchilari ambulator, 9 nafari esa stasionar sharoitda sog‘lomlashtirilishi belgilandi.

Ayni paytda tibbiy ko‘rik yakunlari chuqur tahlil qilinib, har bir davlat fuqarolik xizmatchisi uchun manzilli sog‘lomlashtirish rejalari ishlab chiqildi.