G‘ijduvonda “Qo‘rg‘on” turizm mahallasida qurilish ishlari jadallashmoqda

Shu kunlarda G‘ijduvon tumanining turistik salohiyatini oshirish, sayyohlar oqimini ko‘paytirish hamda mahalliy aholi bandligini ta’minlash maqsadida “Qo‘rg‘on” turizm mahallasida keng ko‘lamli bunyodkorlik va rekonstruksiya ishlari izchil davom etmoqda.

Loyiha doirasida bajarilayotgan ishlarning sifatli va belgilangan muddatlarda amalga oshirilishini ta’minlash maqsadida viloyat turizm boshqarmasi tuman hokimligi hamda tegishli tashkilotlar bilan hamkorlikda doimiy monitoring va o‘rganish ishlarini olib bormoqda. Aniqlangan kamchiliklar joyida bartaraf etilmoqda.

Hozirga kelib mahallada gaz ta’minoti, elektr energiyasi va kanalizatsiya kabi asosiy infratuzilma tarmoqlari to‘liq tortilgan. Ichki ko‘chalarga tosh yotqizish ishlari yakunlangan. Qadimiy darvozalar qayta tiklanib, ularda yakuniy pardozlash ishlari olib borilmoqda. Shuningdek, tarixiy devorlar va hunarmandchilik markazi rekonstruksiya qilinib, qurilish ishlari nihoyasiga yetkazilmoqda.

Mazkur loyiha hududning turistik jozibadorligini yanada oshirish, sayyohlar oqimini ko‘paytirish hamda yangi ish o‘rinlarini yaratish orqali mahalliy iqtisodiyot rivojiga xizmat qilishi bilan ahamiyatlidir.