Buxoroda ikki o‘smir o‘quv yili tugamasidan turib talaba bo‘lishdi

Kogon tuman ixtisoslashtirilgan maktabida yana bir quvonchli voqea! Bu gal maktabning ikki nafar 11-sinf o‘quvchisi o‘zining bilimga chanqoqligi, qat’iyati va tinimsiz mehnati bilan barchani hayratda qoldirdi. Charos Fayziyeva hamda Asilbek Niyazov oliy ta’lim muassasalariga kirish uchun belgilangan eng yuqori — 189 ballni qo‘lga kiritib, o‘quv yili yakunlanmasidan turib talabalik baxtiga erishdi.

Bu shunchaki yaxshi natija emas. Bu — maksimal ko‘rsatkich. Bu — puxta tayyorgarlik, mustahkam bilim va o‘z ustida ishlashning yorqin mevasi.

Charos Fayziyeva fanlar kesimida quyidagi natijalarni qayd etdi:
Matematika — A+
Ingliz tili — B2
Ona tili — B+
Tarix — C+

Asilbek Niyazov ham yuqori ko‘rsatkichlar bilan e’tirof etildi:
Matematika — A
Ingliz tili — C1
Ona tili — B
Tarix — C+

E’tiborga molik jihati shundaki, bu natijalar hech qanday qo‘shimcha repetitorlik yoki maxsus kurslarsiz qo‘lga kiritilgan. Faqat maktabdagi ta’lim jarayoni, mustaqil izlanish, intizom va ustozlarning puxta saboqlari — xolos. Bu esa ta’lim muassasasida yaratilgan sog‘lom o‘quv muhiti, zamonaviy yondashuv va pedagoglarning fidokorona mehnati samarasi ekanini yana bir bor isbotlaydi.

Albatta, bu muvaffaqiyat faqatgina o‘quvchilarning shaxsiy harakati bilan cheklanmaydi. Ularning ortida doimo yo‘l ko‘rsatgan, qo‘llab-quvvatlagan, bilim va hayotiy maslahat bergan ustozlarning sharafli va mashaqqatli mehnati turibdi.

Charos va Asilbek bugun o‘z tengdoshlariga kuchli motivatsiya bo‘la oldi. Ularning erta qo‘lga kiritilgan talabaligi — katta orzular sari dadil tashlangan ilk qadamdir.

Iqtidorli yoshlarimizni ushbu ulkan yutuq bilan chin qalbdan tabriklaymiz! Oldinda ularni bundan-da yuksak marralar kutmoqda.