Jamshid Sharopov Buxoro viloyati hokimining birinchi o‘rinbosari etib tayinlandi

Buxoro viloyatida muhim kadrlar tayinlovi amalga oshirildi. Sharopov Jamshid Fazliddinovich Buxoro viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari – viloyat Iqtisodiyot va moliya boshqarmasi boshlig‘i lavozimiga tayinlandi.

Jamshid Sharopov 1984-yil 27-yanvarda G‘ijduvon tumanida tug‘ilgan. U 2005-yilda Buxoro davlat universitetini, 2009-yilda esa Toshkent davlat iqtisodiyot universitetini tamomlagan. Mutaxassisligi — iqtisodchi.

Uning mehnat faoliyati bank-moliya tizimidan boshlangan. Jamshid Sharopov 2002-yilda AT “Paxta Bank”ning Buxoro viloyati boshqarmasi bank jarayonlari bo‘limi iqtisodiy bo‘linmasida mutaxassis sifatida ish boshlagan.

Keyingi yillarda bank, moliya va davlat boshqaruvi tizimida qator mas’ul lavozimlarda faoliyat yuritdi. Xususan, 2014–2020-yillarda ATB “Agrobank” Buxoro viloyati boshqarmasi boshlig‘i, 2020–2021-yillarda O‘zbekiston Respublikasi Markaziy bankining Buxoro viloyati bosh boshqarmasi boshlig‘i lavozimlarida ishlagan.

2021-yilda Jamshid Sharopov Shofirkon tumani hokimi etib tayinlanib, 2023-yilgacha tumanga rahbarlik qilgan. Shundan so‘ng yana bank tizimidagi faoliyatini davom ettirib, 2023–2026-yillarda ATB “Agrobank” Agrosanoat majmuasi korxonalarini moliyalashtirish departamenti direktori o‘rinbosari lavozimida ishlagan.

Mazkur tayinlovga qadar u ATB “Agrobank” Muammoli kreditlar bilan ishlash departamenti direktori vazifasida faoliyat yuritib kelayotgan edi.

Endilikda Jamshid Sharopov viloyat iqtisodiyoti va moliyasini boshqarish, hududlarning iqtisodiy o‘sishini ta’minlash, yangi daromad manbalarini shakllantirish hamda kambag‘allikni qisqartirish kabi muhim yo‘nalishlarga mas’ul bo‘ladi.

Viloyat hokimining moliya-iqtisodiyot yo‘nalishidagi birinchi o‘rinbosari hududning iqtisodiy rivojlanishida muhim o‘rin tutadigan lavozimlardan biri hisoblanadi. Investitsiyalar, tadbirkorlikni qo‘llab-quvvatlash, budjet imkoniyatlaridan samarali foydalanish, yangi ish o‘rinlarini yaratish va aholi daromadlarini oshirish bu yo‘nalishdagi ustuvor vazifalar sirasiga kiradi.

Jamshid Sharopovning bank-moliya tizimi bilan bir qatorda hududiy boshqaruvda ham tajribaga egaligi yangi vazifalarida muhim ahamiyat kasb etishi kutilmoqda. Ayniqsa, Markaziy bank tizimi, tijorat banki va tuman hokimligidagi faoliyati iqtisodiyotning turli bo‘g‘inlari bilan ishlash tajribasini shakllantirgan.

Hudud iqtisodiyotining barqaror o‘sishini ta’minlash esa mavjud imkoniyatlarni aniq loyihalarga aylantirish, tadbirkorlikni rivojlantirish va aholi bandligini oshirish bilan chambarchas bog‘liq. Kambag‘allikni qisqartirishda ham fuqarolarga shunchaki yordam ko‘rsatishdan ko‘ra, ularni barqaror daromad manbai bilan ta’minlash muhim ahamiyatga ega.

Yangi lavozimda Jamshid Sharopov oldida Buxoro viloyatining iqtisodiy salohiyatidan yanada samarali foydalanish, moliyaviy intizomni mustahkamlash va hududlarda iqtisodiy faollikni oshirishga qaratilgan keng ko‘lamli vazifalar turibdi.

Buxoroisharif.uz jamoasi Jamshid Sharopovni yangi lavozim bilan tabriklaydi va kelgusi faoliyatida muvaffaqiyatlar, viloyat iqtisodiyoti va aholi farovonligini oshirish yo‘lidagi ishlarida omad tilaydi.