Kogonda 600 metrlik salomatlik yo‘laklari bo‘lgan yangi dam olish maskani barpo etildi

Kogon tumanidagi «Bahouddin Naqshband» mahallasining Yangiyo‘l ko‘chasida aholining dam olishi va bo‘sh vaqtini mazmunli o‘tkazishi uchun zamonaviy jamoat maskani barpo etildi. Majmua tun-u kun — «24/7» rejimida faoliyat yuritishga mo‘ljallangan. Bu haqda Buxoro viloyati hokimligi matbuot xizmati Buxoroisharif.uz internet nashriga ma’lum qildi.

Loyiha doirasida 60 sotixdan ortiq hudud obodonlashtirildi. Turli yoshdagi aholining ehtiyojlarini hisobga olgan holda yaratilgan infratuzilma hududni rivojlantirish, qulay sharoit yaratish va sog‘lom turmush tarzini targ‘ib etishga qaratilgan.

Yangilangan ko‘chada bolalar va o‘smirlar uchun zamonaviy o‘yin maydonchasi, yoshlar va sport ixlosmandlari uchun vorkaut maydonchasi tashkil etildi. O‘rindiqlar, tungi yoritish chiroqlari, sayr yo‘laklari va hordiq chiqarish uchun ayvonlar barpo etildi.

Maskanda o‘rindiqlar bilan jihozlangan zamonaviy favvoralar maydoni ham yaratildi. Piyodalar va velosiped harakati uchun mo‘ljallangan salomatlik yo‘laklarining umumiy uzunligi 600 metrni tashkil etadi.

Qurilish-bunyodkorlik ishlari pudratchi «Buxara gold new building» MChJ ishchi-mutaxassislari tomonidan belgilangan loyiha asosida amalga oshirildi. Yangi maskan mahalladoshlarga yoshidan qat’i nazar sayr qilish, oilaviy hordiq chiqarish va sport bilan shug‘ullanish uchun zarur sharoitlarni taqdim etmoqda.