Siz 12 000 000 so‘m yutib olishni xohlaysizmi?

Televideniye, radio, bosma ommaviy axborot vositalari va internet-jurnalistika sohasi vakillari o‘rtasida o‘tkaziladigan ko‘rik-tanlov aholining huquqiy ongi va huquqiy madaniyatini yuksaltirishga, jamiyatda korrupsiyaga nisbatan murosasiz munosabatni shakllantirishda ommaviy axborot vositalarining rolini yanada kuchaytirish, bu borada soha vakillarini moddiy va ma’naviy rag‘batlantirishga qaratilgan.

Ko‘rik-tanlovni o‘tkazish joyi va muddati:

Ko‘rik-tanlov “Xalqaro korrupsiyaga qarshi kurash kuni” munosabati bilan 2022-yildan boshlab har yili o‘tkaziladi hamda g‘oliblar 9-dekabrda aniqlanadi. Unda korrupsiyaning oldini olish va unga qarshi kurashish borasida “Eng yaxshi videorolik yoki ko‘rsatuv” (televideniya va radio), “Eng faol targ‘ibotchi” (bosma ommaviy axborot vositalari), “Eng yaxshi jurnalistik material” (internet-jurnalistika) nominatsiyalari bo‘yicha g‘oliblar aniqlanadi va ommaviy axborot vositalari orqali e’lon qilinadi.

Ko‘rik-tanlovda ishtirok etish tartibi:

– ushbu ko‘rik-tanlovda ishtirok etish istagini bildirgan ommaviy axborot vositalari vakillari, mustaqil jurnalist va blogerlar Axborot va ommaviy kommunikasiyalar agentligi viloyat hududiy boshqarmasining Telegram-kanalida berilgan axborot xatidan foydalanadi va unda belgilangan tartibga amal qiladi;

– nominatsiyalar bo‘yicha ishtirokchilar joriy yilda bajarilgan hamda boshqa ko‘rik-tanlovda ishtirok etmagan loyiha va ijodiy ishlari bilan qatnashishi mumkin. Ishchi guruhi ijodiy ishlarni saralashni o‘z zimmasiga oladi;

– ko‘rsatilgan muddatdan kechikib taqdim etilgan va belgilangan tartibda rasmiylashtirilmagan loyihalar va ijodiy ishlar ko‘rik-tanlovga qo‘yilmaydi.

Ko‘rik tanlovning shartlari va baholash tartibi:

– tanlovga tele, radio, bosma materiallar hamda internet nashrlarida e’lon qilingan ishlar taqdim etiladi (5 tadan kam bo‘lmasligi kerak);

– televideniye va radio bo‘yicha videomateriallar (CD, DVD diskda);

– 5 daqiqadan 30 daqiqagacha bo‘lishi kerak;

– matbuot va internet materiallari asl nusxada yoki ko‘chirma nusxada taqdim etilishi lozim.

Ko‘rik-tanlovning yakuniy bosqichida taqdim etilgan barcha loyiha, ishlanma va ijodiy ishlar nominatsiyalar bo‘yicha ko‘rik-tanlov g‘oliblari Ishchi guruhi a’zolari tomonidan aniqlanadi.

Baholash natijasiga ko‘ra, birinchi o‘rin – I darajali diplom va bazaviy hisoblashning 40 baravari, ikkinchi o‘rin – II darajali diplom va bazaviy hisoblashning 30 baravari hamda uchinchi o‘rin – III darajali diplom va bazaviy hisoblashning 20 baravari miqdoridagi pul mukofotlari bilan taqdirlanadi.