Buxoro yangiliklari

Palovdan boshqa ovqat tarqatganga 75 darra, uloq va poyga qilganga o‘lim jazosi – Buxoro amiri

photo 13 1

Loading

O‘zbek xalqi milliy ma’naviyatining ajralmas qismi sanaluvchi to‘y-hashamlar, oilaviy tantanalar, marhumlarning xotirasiga bag‘ishlangan tadbirlar millatning uzoq yillik qadriyatlari va an’analarini o‘zida aks ettiradi. Ammo hozirgi kunda o‘tkazilayotgan aksar oilaviy tadbirlarda isrofgarchilikka yo‘l qo‘yish, o‘zini ko‘z-ko‘z qilish, urf-odatlar va an’analarni mensimaslik kabi illatlar ko‘zga tashlanyapti. Marosim va tadbirlarimizga xalqimiz dunyoqarashi, milliy an’analariga mutlaqo yot odatlar kirib kelayotgani achinarlidir. Bu kabi “nag‘ma”lar xalqimiz ma’naviyati va turmush tarziga salbiy ta’sirini ko‘rsatmay qolmaydi. Afsuski, dabdabali to‘y-ma’rakalarga xayrixohlik millatning bugun paydo bo‘lgan muammosi emas.

Bundan 100 yil oldingi tariximizga nazar tashlasak, Buxoro amirligida ham dabdabali to‘ylar va marosimlarni tugatish kun tartibida turgan muhim ijtimoiy vazifalardan biri bo‘lganligiga guvoh bo‘lamiz. XX asr boshlarida Buxoro amirligida to‘ylar g‘oyatda hashamdor bo‘lib, odatda 7-8 kun davom etgan, har kuni 6-7 xil ovqat pishirilib, taklif qilingan mehmonlarga ketish chog‘ida 800 grammdan 16 kilogrammgacha qand berish va chopon kiydirish odat tusiga kirgan. Bundan tashqari, nikoh va sunnat to‘ylarida ko‘pkarilar tashkil qilingan.

Buxoro amiri Said Olimxon (1910–1920) hukmronligining dastlabki yilidayoq to‘y-ma’rakalardagi isrofgarchiliklar va dabdababozliklarni tugatishga alohida e’tibor qaratib, birinchi navbatda viloyat beklari, qozilar, amlokdorlar va boshqa mansabdor shaxslarning oddiy oilalar ma’rakalarida ishtirok etishini taqiqlab qo‘ydi. Ularga faqat bir-birlarinikida bo‘ladigan marosimlarga borishga ruxsat berib, o‘shanda ham sho‘rvadan boshqa ovqat tanovul qilishlarini man etdi.

Amir 1911-yil mart oyida “Juda isrofli to‘ylarni tugatish to‘g‘risida” farmon chiqardi. Unga ko‘ra, to‘ylarda 6-7 xil ovqat qilish taqiqlanib, palovdan boshqa ovqat berganlarga 75 darra urish jazosi tayinlandi, sunnat va nikoh to‘ylarida tashkil qilinadigan uloq chopish va poyga tadbirlari bekor qilindi. Ushbu tadbirni tashkil etgan shaxs o‘lim jazosiga mahkum etilishi belgilab qo‘yildi.

Shuningdek, to‘yga kelgan mehmonlarning har biriga chopon berish rasmi man qilindi. 1916-yil 5-iyunda esa Amir Olimxon to‘yga kelganlarga qand berish odatini taqiqlovchi yana bir farmonni imzoladi.

Amir tomonidan xalqning farovonligini ta’minlash maqsadida qabul qilingan bunday farmonlarning buzilish holatlari ayrim mahalliy amaldorlarning poraxo‘rligi va o‘zboshimchaligi tufayli sodir bo‘lib turgan.

Bu davrda oilaviy marosimlardagi isrofgarchiliklar va yangi o‘ylab topilgan odatlar nafaqat Turkiston va Buxoro jadidlari tomonidan, balki ulamolar tomonidan ham keskin tanqid qilindi. Buxoro amirligida yuqori lavozimlarda faoliyat yuritgan mufti Domla Ikromning bu boradagi sa’y-harakatlari fikrimiz dalilidir. Uning “Iyqozu-n-noimiyn va i’lomu-l-johiliyn” (“Uyqudagilarni uyg‘otish va johillarga bildirish”) asarida oilaviy marosimlarda to‘y, “Bibi Seshanba” va aza marosimlari bilan bog‘liq masalalar muhokama qilinadi.

Domla Ikrom mazkur asarida to‘ylar haqida “To‘y va ziyofatlardagi isrofgarchiliklarning barcha ko‘rinishlari tom ma’noda bugungi kunda xalq orasiga o‘rnashgan. Uni biror kishi isrof demay qo‘ygan, aksincha, isrofchilarni karam va saxiylik sohiblari deb aytishadi, isrofgarchilik qilmaydiganlarni esa ziyofatxo‘rlar baxil deb atashadi. Masalan, birov dasturxon ustiga ahli salaf odati deb bitta non va taom qo‘ysa, uni bag‘oyat ayblaydilar. Bugungi kunda diyorimizda bir kishining oldiga turfa shirinliklaru ichimliklar va yeguliklarni chunon ko‘p qo‘yadilarki, o‘tirishga joy topilmas”, deb yozadi.

Asarda ko‘tarilgan yana bir muhim masala Xotinlarning aza marosimlari bo‘lib, xalq tomonidan “yigirma”, “qirq”, va “yil” (Inson vafot qilgandan so‘ng o‘tkaziladigan marosimlar haqida gap ketmoqda. Islomdan avvalgi zamonlarga borib taqaladigan bu xildagi marosimlar – “qirq” inson o‘lganining qirqinchi yoki undan kamroq kuni, “yigirma” yigirmanchi yoki undan kamroq kuni, “yil” deb esa bir yildan so‘ng yoki undan oldin o‘tkaziladigan marosimga aytiladi. Bu marosimlarni o‘tkazish hozirgacha turkiy xalqlar orasida joriy bo‘lib kelmoqda.) deb nomlangan.

Domla Ikrom bu rasm-rusmlar islom dinida mavjud emasligini Qur’on oyatlari orqali isbotlab, ayollarning ishlarini qoralaydi: “Bir necha hamoqatpesha to‘planib olib, turli-turli nolalar qilib, ko‘kraklariga urib, yig‘laydilar. Bir boshqa ayol ta’ziyaxonaga kelsa, o‘sha nolalarni takrorlaydilar. Ko‘kraklariga urib yig‘lashni o‘zlaricha vojib qilib olganlaridek, turli maxsus taomlarni ham shunday belgilab olganlarki, ularni o‘zgartirib bo‘lmas. Bu taomlardan ayrimlarini o‘sha joyda yeyish vojib bo‘lsa, ayrimlarini tashqariga chiqqach yeyishlik vojib bo‘ladi. Ta’ziya ochgan ayrim ayollarga muayyan kunda gazlama va sovun berishlik ham vojib bo‘ladi. Va ayollarning bu yomon qiliqlari erkaklarga, balki ulamoyu fuzalo, hokimlarning ham barchalariga ma’quldirki, biron kishi uni bekor qilishni o‘ylamas. Aksincha, ko‘pchilik odamlar bularni kerak deb bilurlar va ko‘p aqchalar sarflarlar”.

Iqtisodiy chiqimlar va isrofgarchilikdan iborat bo‘lgan bu marosimlar hokimlar tomonidan to‘xtalishi lozimligini ta’kidlab, davlat lavozimida xizmat qiluvchi mansabdorlar bunday tadbirlarni o‘tkazishda xalqqa shaxsiy namuna ko‘rsatishlari kerakligini uqtiradi.

Xulosa qilib aytganda, Amir Olimxon serxarajat to‘ylar oilalarni iqtisodiy falokat yoqasiga olib kelishini anglagan holda, bunday to‘ylarni bartaraf etish bo‘yicha qat’iy talablarni ishlab chiqqan. Natijada to‘y kunlari qisqartirilib, bir xil ovqat pishirish belgilab qo‘yildi, chopon kiydirishlar keskin kamaydi, qand tarqatish to‘xtatildi hamda ko‘pkarilar o‘tkazilmaydigan bo‘ldi. Mufti domla Ikromning “Iyqozu-n-noimiyn va i’lomu-l-johiliyn” asari esa xalq orasida “Dar bayoni bid’aoti mashhura” (“Mashhur bid’atlar bayoni”) nomi bilan tanildi va oilaviy marosimlarga kirib kelayotgan ayrim yangiliklarga chek qo‘yildi.

Muallif: Dilnoza Jamolova, O‘zFA Tarix instituti doktoranti

Muhokama qilish (0 ta sharh)

Javob berish


  • Telegram
    photo
    18.03.2024

    Buxoroda maktab o‘quvchilarini olib ketayotgan avtobus va yuk mashinasi o‘rtasida sodir bo‘lgan avariya oqibatida o‘quvchi halok bo‘ldi (video)

    photo
    29.02.2024

    Buxorodagi san’at maktabida usta pianinoni keti bilan chalgani rostmi yoxud feyk-xabar ortida nima turibdi?

    photo
    27.02.2024

    Buxorolik tadbirkorning o‘z joniga qasd qilgani rostmi yoxud yolg‘on xabar ortida shaxsiy manfaat turibdimi?

    photo
    26.02.2024

    Buxoroda aeroport orqali qadimiy tangalarni Dog‘istonga olib ketishmoqchi bo‘lishdi

    photo
    23.02.2024

    Har bir murojaat e’tiborda — Davlat kadastrlari palatasi Buxoro viloyati boshqarmasi

    photo
    09.02.2024

    Ipoteka krediti asosida olingan uy-joyni kreditni to’lamasdan boshqa shaxsga sotish mumkinmi?

    photo
    31.01.2024

    Huquqshunos sharhi: talabalar ham oliygohdan “suyunchi puli” olishga haqli

    picture
    25.01.2024

    Murodjon Umarov O‘zbekiston mahallalari uyushmasi Buxoro viloyati boshqarmasi boshlig‘i etib tayinlandi

    picture
    23.01.2024

    Jinoyat ishlari bo‘yicha Qorako‘l tumani sudi raisi Boborahim Achilovga hayfsan berildi

    picture
    19.01.2024

    “Yordam beringlar, otam onamni o‘ldiryapti!” — 20 yillik turmushdan so‘ng qorako‘llik erkak o‘z xotinini bolalari ko‘z o‘ngida o‘ldirdi

    picture
    18.01.2024

    G‘ijduvonlik “uddaburon” tanishining xonadonidan tamaki kontrabandasi uchun foydalanmoqchi bo‘ldi

    picture 1
    17.01.2024

    Markaziy bankning Buxorodagi rahbari Erkin Mansurovning 20 mln dollarlik jinoyat ishidagi aybi isbotlanmadi

    picture
    17.01.2024

    Buxoroda bojxona orqali jangovor o‘qlarni olib o‘tishga urinish bo‘ldi

    Buxoroisharif.uz

    Eng ko‘p o‘qilgan maqolalar

    Яндекс.Метрика

    Tahririyat manzili: 200400, O‘zbekiston Respublikasi, Buxoro viloyati, Buxoro tumani, Nodirabegim ko‘chasi, 23-uy. Bosh muharrir: Nazarov S. L. Muassis: “Buxoroisharif UZ Axborot xizmati” xususiy korxonasi. Ariza, taklif va shikoyatlaringizni info@buxoroisharif.uz ga yoʻllang. Joylashtirilgan maʼlumotlardan toʻliq yoki qisman foydalanish, tarqatish, chop etish faqat manba ko‘rsatilgan hollarda ruxsat beriladi.

    © 2023. Ushbu sayt OAV sifatida Oʻzbekiston Respublikasi Prezidenti Administratsiyasi huzuridagi AOKA dan 1394 raqami bilan 2021-yilda ro‘yxatdan o‘tgan.