Malayziyaning yangi bosh vaziri o‘ziga ajratilgan Mercedes dan voz kechdi

Malayziyaning yangi bosh vaziri Anvar Ibrohim davlat xarajatlarini kamaytirish maqsadida Mercedes S600 qimmatbaho avtomobilidan voz kechishga qaror qildi. U bu haqda o‘z Facebook sahifasida maʼlum qilgan.

"Men Mercedes S600 avtomobilidan voz kechishga qaror qildim. Mening ishim qo‘shimcha xarajatlarga sabab bo‘lishini istamayman. Buning o‘rniga administratsiyam ixtiyoridagi boshqa istalgan mashinadan foydalanaman", — degan Malayziya hukumati rahbari.

Joriy yilning 25-noyabrida Ibrohim vazirlar sonini va ularning oylik maoshini ham qisqartirishini aytgandi.

Eslatib o‘tamiz, 19-noyabrda Malayziyada umumiy saylovlar bo‘lib o‘tdi. Uning yakunida hech qaysi partiya va koalitsiya parlament quyi palatasida ko‘pchilik o‘rinni egallay olmadi. Shundan keyin turli partiyalar koalitsiyasini tuzish zarurati yuzaga keldi. Ammo tomonlar bu bo‘yicha kelishuvga erisha olmadi. Yakunda Malayziya sultoni Anvar Ibrohimni bosh vazir etib tayinladi.